ငါးမန်းများ

ငါတို့ဟာ
မရည်ရွယ်ဘဲနဲ့ပဲဖြစ်ဖြစ်
တမင်တကာပဲဖြစ်ဖြစ်
သွေးထွက်သံယိုတွေ မဖြစ်သင့်ဘူး
မဖြစ်ကြရဘူး
ငါတို့ရဲ့သွေးညှီနံ့ကို
ရေညာရေအောက်က အနံ့ခံနေတဲ့
ငါးမန်းတွေ ရှိတယ်
သူတို့ဟာ
ချွန်ထက်တဲ့ သွားတွေနဲ့
ခိုင်မာတဲ့ မေးရိုးတွေနဲ့
သူတော်ချင်းချင်း သီတင်းလွေ့လွေ့တွေနဲ့
အနိဌာရုံတွေကို အစဉ်အမြဲ ငံ့လင့်နေတယ်
လူတွေမကျင်လည်တတ်တဲ့ အရပ်ဒေသမှာ နေခြင်းအားဖြင့်
အမြဲတမ်း တစ်ပန်းသာနေတယ်
လှိုင်းကြောက်လှေမှောက်ရင်တော့
အသက်ရောဘ၀ပါ ပျောက်မယ်
လှိုင်းထန်လေကြမ်း မုန်တိုင်းရမ်းလည်း
ထိန်းမတ်ပဲ့ကိုင် လှေကိုနိုင်ရင်တော့
ငါးမန်းများ လမ်းသလားရုံသာ။

သူတို့ဆူးတောင်ကိုမှ
ဟင်းချိုလုပ်သောက်နေသူတွေအတွက်တော့
ဒီကဗျာ ရီစရာပေါ့။

ညိမ်းညို

မြစ်ချို

သစ်တစ်ပင် တောတစ်အုပ်
မျိုးစေ့ထုပ်မှာ သိမ်းမြုပ်တယ်။

လှံတစ်စင်း ဓားတစ်လက်
ပေခုံထက်မှာ သိုဝှက်တယ်။

စာတစ်လုံး ဆေးတစ်စက်
ရင်မြေထက်မှာ ကြဲပက်တယ်။

ပျိုမြစ်အားသစ် ချစ်ခြင်းမေတ္တာ
စာနာဖေးမ ပရမြစ်တစ်စင်း
ကဗျာအလင်းမှာ စီးဝင်တယ်။

ညိမ်းညို

အဆွေးသမား

အဆွေးသမား ၁

နှစ်ကာလတွေ တအိအိပြိုကျလာ
ချေး(ဂျီး)မှုန်တွေ အထပ်ထပ်ကပ်ငြိလာ
လိုနေတာ တစ်ခုခုပဲ
တစ်ခုခုဟာ လိုနေမြဲပဲ
ငါပြန်ရှာတယ် ငါတွေ့ချင်ရဲ့
လတ်ဆတ်မှုဟာ တဇတ်ဇတ်ခုန်လို့
အသွေးအသားထဲကနေ အရေပြားအထိ
အရင်တုန်းကလို
အခု
ငါပြန်ရှာတယ် ငါမတွေ့တော့
အလို…ဆန်းလှချည့်။

အဆွေးသမား ၂

သူ လာခဲ့တယ်
သူ ပြန်သွားတယ်
အခါခါ ဦးညွှတ်လို့
အခါခါ ရူးသွပ်လို့
ငှက်မွှေးကလေး ထိုးစိုက်ခဲ့တယ်ပေါ့
လေနီကြမ်းတို့ မလာမီ။

အဆွေးသမား ၃

ခရီးလမ်းပန်း သာပါစ
‘သွားရမည့်ခရီးကား ဝေးသေး၏
ခြေသာလျှင် ယာဉ်ရှိကုန်၏’ *
အဆွေတို့
အမှောင်မသန်းခင်
တောင်တန်းတွေဆီ ခရီးနှင်ပ။

*မင်းဘူးဦးသြဘာသ-ဝေဿန္တရာဇာတ်တော်ကြီးမှ

အဆွေးသမား ၄

ချောင်းတရိုး မြစ်တသွယ်
ဘယ်လှေကို စီးရပ
ချည်ကြိုးတို့ ပြေပါစ
သီကြိုးတို့ ညီပါစ။

အဆွေးသမား ၅

ရီစရာတွေးတယ်
ရီစရာပြောတယ်
ရီစရာလုပ်တယ်
မရီရတဲ့ မျက်နှာအသေကြီးနဲ့
ဆွေးတယ်
လောကပါလတရားများကို
အမှန်တကယ် လှိုက်လှိုက်လှဲလှဲ။

အဆွေးသမား ၆

မြစ်ကို အဖော်ပြု၍
တောင်တန်းကြီးများ မားမားရပ်တည်
တစ်ချိန်ကျလို့
မြစ်ဟာ ပင်လယ်ဆီစီးဝင်သွား
တောင်တန်းကြီးများ
ကြီးကောင့်ကြီးမား အားနာစရာ။

အဆွေးသမား ၇

နေရောင်ခြည်
လေပြေ
အသာတကြည် ခပ်ယူပြီးသကာလ
ပန်းနှင့်ပင်ဖြစ်စေ
(ကျွန်ုပ်တို့) တစ်ဦးကိုတစ်ဦး မပစ်ပေါက်ကြေး။

အဆွေးသမား ၈

ဆီကွက်သော စက္ကူလို
ကြာလေ ပြန့်ကားလေ
သံသယဟာ အစွမ်းထက်ရဲ့
ကံ စိတ် ဥတု အာဟာရ
သေသေချာချာချိန်ပြီး ပစ်ချ
မြစ်ချောင်း အင်း အိုင် ပင်လယ် သမုဒ္ဒရာများ
လက်တပစ်စာ ဖြစ်သွား
အရာရာဟာ နာဖျားပျက်ကြွေ
ခါးတွေ တစ်သက်လုံးကုန်းခဲ့ကြ
ဘာအထုပ်များ ပါပါလိမ့်။

အဆွေးသမား ၉

ဖောက်ခဲ့ကြ
လျှောက်ခဲ့ကြ
ပျောက်ခဲ့ကြ
ထင်ရှားတာလဲရှိ၊ မထင်ရှားတာလဲရှိ(လမ်းတွေ)
အဆွေးသမားဟာ ဆွေးလို့
အတွေးသမားဟာ တွေးလို့
အငေးသမားဟာ ငေးလို့
ထမင်းတစ်နပ်စာမျှဖြစ်စေ
ဘ၀အပေါ် မြိန်ယှက်ဖို့ လိုရဲ့။

အဆွေးသမား ၁၀

တောမြိုင်သို့ ၀င်ပါအံ့
ခြုံနွယ်ဆူးရစ်တို့ ထူပါအံ့
ပေါက်ပြဲခြစ်ရာ ထင်ပါအံ့
အပြစ်မတင် ချစ်ချစ်ခင်ခင်ရယ်ကြရအောင်လေ။

အဆွေးသမား ၁၁

သွား ၃၂ လျှာ ၁
ဝါးသလောက် အရသာမသိ
စားကောင်းသော အသီး
မစားကောင်းသော အသီး
ဝမ်းမီးငြိမ်းပုံ မတူလေ။

အဆွေးသမား ၁၂

ပြောရင်း တိမ်ဝင်လာသော အသံများ
ပြေးရင်း တိုဝင်လာသော ခြေထောက်များ
စားရင်း ကျုံ့ဝင်လာသော အစာများ
ဘယ်ညာ လက်နှစ်ဖက်စလုံး မအားလပ်ကြ
အသက်ဇီဝလေးကို ယက်ယက်ပြီးကျင်ယူ
သူတင်ကိုယ်တင်ခေတ်ကြီးထဲ
ကိုယ်ကမတင်သောအခါ သူချည်းတင်လေသတည်း။

အဆွေးသမား ၁၃

စိမ်း
ပြာ
မှောင်
ညို
ရောင်
သန်း
အရိပ်အယောင်များ လမ်းသလားကြရာ
ဘ၀တိုတို ၀င်္ကပါ
ငါတို့ ယောင်ချာချာ။

အဆွေးသမား ၁၄

စားတယ် သောက်တယ်
ယဉ်ယဉ်ကျေးကျေး
ပညာရှာတယ် ငွေရှာတယ်
ယဉ်ယဉ်ကျေးကျေး
တွန်းတယ် တိုက်တယ်
ယဉ်ယဉ်ကျေးကျေး
ကြာသော်
သိပ္ပံနည်းကျဘာသာရပ်များ တိုးပွားလာ
ယဉ်ယဉ်ကျေးကျေး ဟူ သ တတ်။

အဆွေးသမား ၁၅

၁
မီးခြစ်ယူပါ
၂
ခြစ်ပါ
၃
မီးတောက်ပါစေ
၎
မတောက်ရင် တောက်အောင်ခြစ်ပါ
၅
ထိုမီးခြစ်သည် ကောင်းပါစေ
၆
မကောင်းသော် လဲရန်ပြင်ရန် ၀န်လေးခြင်း မရှိပါစေ
၇
မီးတောက်မှ ပြီးမြောက်မယ်။

အဆွေးသမား ၁၆

ဧယင်ကျူးကို ဧယင်ကျူးလိုငိုမည်
နတ်ဒိုးကို နတ်ဒိုးလိုဆိုမည်
တချို့ချိန်ခါငို တချို့ချိန်ခါမြူး
ရယ်သောအခါ အသံထွက်ပါစေ
လူသည်ကား တစ်ယောက်တည်း။

အဆွေးသမား ၁၇

မှောင်ကြီးမဲမဲ
ကိုယ့်ခေါင်းကိုယ် ရိုက်ခွဲပြီး
ရသလောက် သဲ့ယူခဲ့တယ်
‘အလင်းရောင်’

အဆွေးသမား ၁၈

နျူကလီးယားမှိုပွင့်ဟာ
ဂေါ်ဖီပန်းလောက် မလှပါ
မျက်ရည်တွေ သိမ်းဆည်းဖို့
နှလုံးအိမ်သည် နူးညံ့ဖို့လို
အမြောက်ဆံ ကျည်အခွံများ ဘုရားပန်းဝေေ၀ဆာ
ကမ္ဘာအသစ်မှာ
(ကျွန်ုပ်တို့) ဆွေးဖွယ်တေးများ မသီတော့ပါ။

အဆွေးသမား ၁၉

ကွင်းအစပ်မှာ လေတဟူးဟူး
ပင်အပ်ကလေးများ ရနံ့မှာပျော်ဝင်
ညောင်းညာကိုက်ခဲ ဘူတာအိုများ
ခရီးဆက်လက်ထွက်ခွာ
လက်ပြလိုသည်ဖြစ်စေ လက်မပြလိုသည်ဖြစ်စေ
လက်ပြ!
Ok?

ညိမ်းညို

နွေဦးဝေဒနာ

နွေဦးဝင်လေပြီ။ တဆောင်းတွင်းလုံး ကုပ်ချောင်းချောင်းဖြစ်ခဲ့ရသော မြို့ကြီးသည် နွေဦးဝင်ပြီဆိုသည်နှင့် ခြေညောင်းလက်ဆန့် ပြုပါတော့သည်။ သစ်ပင်ပန်းမာလ်တွေ တအုပ်တမကြီး တိုးထွက်လာကြသည်။ သည်းထန်သောနှင်းတို့၏ ဒဏ်ချက်ကြောင့် အရိုးပြိုင်းပြိုင်းဖြစ်ခဲ့သမျှ နွေဦး၏ဖေးကူမှုဖြင့် အစွမ်းကုန် ပွင့်လန်းလာကြသည်။ နှင်းတို့ဖြင့် စွတ်စိုကသီခဲ့သော လမ်းတို့သည် သွေ့ခြောက်သာယာလျက် ရှိနေပါသည်။ နွေဦးသည် မြို့ကြီးကို ကင်းဘတ်စပေါ်တင်ကာ စုတ်တံကြီးတစ်ချောင်းဖြင့် အစိမ်းရောင်ဆေးသားများကို တရစပ် ဆွဲချလိုက်သကဲ့သို့ ရှိပါသည်။ မြင်မြင်ရသမျှ သစ်လွင်စိမ်းစိုနေသည်။ စိမ်းမြလတ်ဆတ်သော၊ သာယာကြည်လင်သော၊ သန့်စင်လွတ်လပ်သော အခြင်းအရာတို့ဖြင့်သာ ပြည့်နှက်လျက်ရှိသော နွေဦးသည် မြို့သူမြို့သားတို့ အထူးမျှော်လင့်တောင့်တသော ရတုရာသီလည်း ဖြစ်မည်ထင်ပါသည်။

နွေဦးသည် သဘာဝ၏ လက်ဆောင်မွန်များကို တပါတည်း ဆောင်ယူလာတတ်သည်။ ရှုမျှော်ခင်းတို့က စိမ်းစိုကြည်လင်စွာ၊ မြင်ကွင်းဝယ် ရှင်းသန့်လျက်ရှိသည်။ မပူမနွေး သာသာညင်းညင်း တိုက်ခတ်လျက်ရှိသော နွေဦးလေပြေသည် ရှိန်းမြလတ်ဆတ်လှ၏။ ဓာတ်ကြိုးများ၊ ဓာတ်တိုင်များ၊ လူသွားလမ်း အကာအရံများ၊ အချက်ပြမီးတိုင်များ၊ ဘတ်စ်ကားဂိတ်များ၊ အမှိုက်ပုံးများ၊ လမ်းဘေးဈေးဆိုင်ကလေးများ၊ ရေနွေးငွေ့ပေးသော ပိုက်လိုင်းကြီးများ၊ တိုက်တာအဆောက်အဦများစသော ရှိရှိသမျှ အစုစုတို့သည် ညစ်ပတ်ပေရေနေသော အ၀တ်ဟောင်းများကို ခွာချ၍ အ၀တ်သစ်လဲလိုက်သကဲ့သို့ စင်ကြယ်သန့်ရှင်းနေပါသည်။ သဘာဝ၏မွမ်းမံမှုဖြင့် မတင်းတိမ်နိုင်ရသေးကား လူတို့သည် ထပ်မံပြုပြင်ကြလေသည်။ ထိုအခါ နွေဦးသည် ဆိုဖွယ်ရာမရှိ၊ နှစ်လိုဖွယ် အတိသာ ဖြစ်တော့သည်။

နွေဦး၏လှည်းကျင်းမှုဖြင့် သန့်စင်ပြီးဖြစ်သော ဓာတ်တိုင်တို့တွင် လူသား၏လုပ်အားဖြင့် လှပသော ပန်းခြင်းများကို ချိတ်ဆွဲလိုက်ကြပြီဖြစ်သည်။ လမ်းတလျှောက်နှင့် ကားမှတ်တိုင်များတွင် ညစ်ထေးထေး ရှိနေတတ်သော အမှိုက်ပုံးများသည်ပင် ဆေးရောင်အသစ်ဖြင့် မော်ကြွားနေပြီဖြစ်သည်။ ပလက်ဖောင်းများသည် အစိမ်းနှင့်အ၀ါ စပ်ကြားခြယ်သလျက် သူတို့မျက်နှာကို တို့ပတ်ရိုက်ကြလေသည်။ နေရောင်အောက်တွင် စင်းစင်းကြီး လဲလျောင်းကာ များမကြာမီ သူတို့ကျောကုန်းပေါ် ဖြတ်လျှောက်လာကြတော့မည့် နွေဦး၏ ခြေသံများကို နားစွင့်နေကြပုံရသည်။

သူသည် အခန်းပြတင်းဝမှ မျှော်ငေးလျက်ရှိသည်။ အဆောင်ရှေ့ လမ်းတစ်လျှောက်တွင် အရောင်အသွေးစုံလူတို့ ဖြတ်သွားဖြတ်လာပြုလျက် ရှိသည်။ ယဉ်သွားယဉ်လာကား အခုလို နေ့လည်ဘက်မျိုးတွင် ကျဲပါးလေ့ရှိသည်။ ညနေပိုင်းတွင်မူ ကားတွေများလှသည်။ နွားနို့ဖြန့်ဖြူးသော ကားကြီးများကို ခပ်စိပ်စိပ် တွေ့ရတတ်သည်။ သူတို့သည် ဓာတ်ဆီတင်သော ကားကြီးများနှင့် သဏ္ဍာန်တူကြသည်။ ကျောကုန်းပေါ်တွင် ကြီးမားသော စည်ကြီးများကို ထမ်းပိုးထားတတ်ကြသည်။ လမ်း၏ ဘေးတဖက်တချက်တွင် ကျယ်ပြန့်သော ပလက်ဖောင်းများ ရှိကြပြီး လက်ရန်းကို သံပိုက်လုံးများဖြင့် အလှဆင်ထားသည်။ ခါးစောင်းခန့်မြင့်သော ထိုပလက်ဖောင်း လက်ရန်းများကို လွန်သော် တောအုပ်ကလေး ရှိလေသည်။ အဆောင်နေ ကျောင်းသားတို့သည် ကျောင်းသို့သွားသော် ထိုတောအုပ်ကလေးကို ဖြတ်ကြရသည်။ ယခုမူ နွေဦး၏တန်ခိုးဖြင့် ထိုတောအုပ်ကလေးသည် ရွက်နုတို့တဝေေ၀ ရွက်သစ်တို့တဖားဖားရှိကာ လှချင်တိုင်း လှနေတော့သည်။

သူတို့ခပ်ငယ်ငယ် ကျောင်းသားဘ၀တုန်းက စာစီစာကုံးရေးကြပုံများကို သတိရနေမိသည်။ သည်တုန်းကတည်းက နွေးဦး၏ အလှသည် သူတို့၏ စာစီစာကုံးများတွင် မပါမဖြစ်သော ဇာတ်လိုက်ကျော်ကြီး ဖြစ်သည်။ တွေးလို့မကုန်၊ ရေးလို့မ၀၊ ခြယ်သလို့မဆုံးသော စာပန်းချီတစ်ချပ်လည်း ဖြစ်လေသည်။ ထိုစဉ်က သူတို့သည် ထိုထိုသော ကဗျာလင်္ကာတို့ကို နှုတ်ဝယ်ရွရွ ကျက်မှတ်ကြပြီးလျှင် နွေအလှကို စာသကြလေသည်။ “လေခမြေသက်၊ ဈာန်ဝိတက်သို့၊ သစ်ရွက်ရော်ရီ၊ ဣန္ဒနီဝယ်၊ သိင်္ဂီတစ်ဝက်၊ ဖက်၍ဆေးစုံ၊ ခြယ်သောပုံသို့” စသည့်ဖြင့်လည်း အဟောင်းတစ်ဝက် အသစ်တစ်ဝက်ဖြင့် နီကျင်စိမ်းမြလျက်ရှိသော သစ်ရွက်ကလေးများကို ကိုးကားညွှန်းဖွဲ့ခဲ့ကြသည်။ ဆရာတော်ရှင်ဥတ္တမကျော်၏ တောလားများသည် သူတို့ စာသင်သားများအဖို့ ကျက်မှတ်ကိုးကား၍ မကုန်နိုင်အောင်ပင်။ စာသင်ခန်းပြင်ပသို့ ကြည့်လိုက်ပြန်ပါက ကျောင်းဝင်းကြီး တစ်ခုလုံးသည်ပင် “ဆောင်းကျွတ်လုပြီ၊ နွေရာသီလည်း၊ မပီတတ်သေး၊ ၀ိုးဝါးထွေးလျက်” ရှိနေသည် မဟုတ်ပါလား။

တစ်နှစ်တွင်မူ နွေဦးက သူ့ကို ထိတ်လန့်စေခဲ့သည်။ ကျောင်းသုံးဗလာစာအုပ်ထဲမှ ဥသြငှက်ကလေး၏ တေးသံသာတွင် ယစ်မူးနေသော သူ့ကို မီးသတ်ကားမှ ဥသြဆွဲသံက စူးစူးရှရှ လှုပ်နှိုးလိုက်သည်။ မဝေးလှသော အရပ်ဆီမှ မီးညွှန့်မီးစွယ်များ ကောင်းကင်သို့ ထိုးတက်နေသည်ကို မြင်ရပါသည်။ မီးခိုးမှိုင်းများ တလူလူ လွင့်နေပါတော့သည်။ နွေလေရူးက မီးလောင်ရာ လေပင့်လိုက်သောအခါ ပေါ့ပါးသောပစ္စည်းများ၊ အ၀တ်စများနှင့် ပလတ်စတစ်အိတ်ခွံများ ရောထွေးပလူပျံကုန်သည်။ လေကြောင်းတလျှောက် ညှော်နံ့များ၊ မီးခိုးနံ့များ ဆိုးရွားစွာ ပျံ့နှံ့နေသည်။ ယောက်ယက်ခတ်နေသော လူအုပ်ကြီးက ဟိုမှသည် ဦးတည်ရာမဲ့ ပြေးလွှားနေကြသည်။ အော်သံခေါ်သံတို့ ကျွက်ကျွက်ညံနေသော လမ်းသွယ်လေးက မီးသတ်ကားဝင်ရန်ပင် ခက်ခဲနေပြန်သည်။ မီးသတ်ရဲဘော်တို့မှာ မမီမကမ်းနှင့် ကြိုးစားငြိမ်းသတ်ကြရှာသည်။ ထိုနွေဦးသည် မသာယာသော ဥသြသံဖြင့် ရေရှားသော သူတို့ ရပ်ကွက်လေးကို မီးသတိပြုစေခဲ့သည်။ ကူညီရိုင်းပင်းစေမှု သံပတ်ကို တစ်ထစ်တင်းစေခဲ့သည်။

လေပြေသည် တောအုပ်လေးကို ဖြတ်သန်းလာကာ မပြင်းမပျော့ တိုးဝှေ့ကျီစယ်၏။ သစ်စိမ်းရနံ့တို့ လွင့်ပါလာ၏။ တံခါးပေါက်များကို အကုန်ဖွင့်ထားရာ လေသည် တသုန်သုန်တဖြူးဖြူး တိုးလျှိုပေါက် ၀င်ထွက်လျက်ရှိသည်။ သူ့စိတ်သည် နာရီချိန်သီးပမာ လှုပ်ရမ်းလျက်ရှိသည်။ စိတ်ချိန်သီးသည် ပစ္စုပ္ပန်အလယ်ဗဟိုတည့်တည့်၌ မနေ။ အတိတ်သို့လည်းကောင်း၊ အနာဂတ်ဆီသို့လည်းကောင်း ရှေ့တိုးနောက်ငင် ယိမ်းခါနေသည်။

ရေရှားသော သူတို့ရပ်ကွက်လေးမှာ နွေရယ်လို့မှမဟုတ် ဆယ့်နှစ်ရာသီပတ်လုံး ရေအတွက်နှင့် လုံးပန်းနေရတတ်သည်။ နွေဆိုရင်တော့ သာ၍ ဆိုးရွားတတ်သည်။ လူကြီးများက စားဝတ်နေရေးအတွက် လုံးပန်းကြပြီး သူတို့ကလေးများက ရေအတွက် လုံးပန်းရသည်။ တကယ်တော့ နွေရာသီ ကျောင်းပိတ်ရက်များသည် ရေရှာပုံတော်ဖွင့်ရသော ခရီးရှည်ကြီးသာ ဖြစ်လိမ့်မည်ထင်သည်။ တစ်နှစ်မတော့ ကံအားလျော်စွာ သူတို့တောင်ကုန်းလေး၏ အခြေတွင် ရေထွက်ပိုက်တစ်ခု ရောက်လို့နေသည်။ ဟောင်းမြင်းနေပြီဖြစ်သော အုတ်တံတိုင်းပျက်ကြီးနှင့်ယှဉ်ကာ သစ်သားခွထောက်ကလေးပေါ် မေးတင်နေသော ထိုရေပိုက်တွင် နှုတ်သီးခေါင်း မရှိရှာ။ ချယ်ရီသား အတိုတစ်ခုဖြင့် အဆို့ပမာ ပိတ်ထားရသည်။ ပြောမည့်သာ ပြောရသည်။ ချယ်ရီသားအဆို့ဖြစ်စေ၊ သံနှုတ်သီးခေါင်းဖြစ်စေ မရှိလို့လည်း ဘာမှမဖြစ်။ ရေလာချိန်က မနက်၅နာရီမှ ၇နာရီထိ၊ တစ်နေ့လုံးပါမှ ထို၂နာရီသာ ရေလွှတ်သည်။ တန်းစီစောင့်နေသော လူတန်းကြီးနှင့်ယှဉ်သော် လွှတ်သောရေမှာ မပြောပလောက်။ ချယ်ရီသားအဆို့မှာ ရေလာနေစဉ်အချိန်တွင် ရေပိုက်နှင့် ခပ်ဝေးဝေးသာ နေခွင့်ရှိသည်။ ရေလွှတ်ချိန်ရပ်ပြီဆိုမှ မကောင်းတတ်၍ အဆို့နှင့် ပိတ်ခဲ့ကြခြင်းသာ။ အမှန်တကယ်အားဖြင့် ထိုအချိန်တွင် ရေမလာတော့သော ပိုက်သည် အဆို့မခြုံပါသော်လည်း လုံပြီးသား မဟုတ်ပါလား။

သူတို့ သူငယ်ချင်းတစ်သိုက်ကတော့ တစ်နေရာထဲမှာ အကြာကြီးရပ်စောင့်နေရမှာ စိတ်မပါကြ။ ဝေးချင်သလောက် ဝေးပါစေ၊ မြန်မြန်ထက်ထက်သာ သွားလိုက်ချင်သည်။ မှတ်မှတ်ရရ ငါးတန်းဖြေပြီးစ နွေရာသီကျောင်းပိတ်ရက် တစ်ရက်တွင် တကောင်းနန်းတိုင်အထိ ရေသွားခပ်ဖို့ သူတို့ အစပြုခဲ့ကြသည်။ မြို့နှင့်၂မိုင်ခန့်ဝေးသော တကောင်းနန်းတိုင်တွင် အလွန်ကြည်လင်သော ရေထွက်ရှိသည်။ အ၀တ်လျှော်ဖွပ်သူများ ရေချိုးသူများ သွားလေ့ရှိကြသော်လည်း သုံးရေအတွက်မူ သူတို့အဖွဲ့သည် အဦးဆုံး ဖြစ်မည်ထင်သည်။ ဝေးပေမဲ့ ဝေးသည်လို့မထင်၊ သူတို့ကတော့ ပျော်သည်။ အလိုရှိသလောက်ရေကို အလိုရှိသလို ခပ်ယူနိုင်သည်။ နံဘေးဝန်းကျင်တွင် ရှမ်းဇီးသီးများ၊ မှန်ခိုသီးများ စသည် ရှာဖွေခူးဆွတ်နိုင်သေးသည်။ အမှန်အားဖြင့် သူတို့မြို့လေးလောက် ရေထွက်ပေါများသောမြို့ အတော်ပင် ရှားပါလိမ့်မည်။ ဒါနဲ့များ ဘယ့်နှယ်ကြောင့် ရေအတွက် သည်မျှ ကိစ္စ၀ိစ္စများနေရသည်ကို သူတို့ နားမလည်နိုင်ကြ။ ငါးတန်းကျောင်းသားလေးတွေဆိုတော့ အတော်ငယ်ကြဦးမည်။ လူကြီးများတော့ဖြင့် နားလည်နိုင်ကြမည် ထင်သည်။

တစ်ခါတစ်ရံတော့ တပ်ကုန်းဘက်သို့ သွားတတ်ကြသည်။ တပ်ကုန်းဟု အလွယ်ခေါ်ကြသော်လည်း အမှန်တကယ် ရေကန်ရှိသည်က ဘုန်းကြီးကျောင်းတွင် ဖြစ်သည်။ ခပ်မို့မို့ မြင့်တက်နေသော ကုန်းထိပ်တွင် တည်ထားသော ဘုန်းတော်ကြီးကျောင်း ဖြစ်သည်။ မြို့၏အဖျားပိုင်းဘက်မှ နိမ့်ဆင်းပြေပြစ်သော ရပ်ကွက်များကို ရေပေးဝေရန် ထိုကျောင်းတွင် အလွန်ကြီးမားသော ရေလှောင်ကန်ကြီး သုံးကန်ရှိသည်။ ထိုရပ်ကွက်များသည် မြို့၏ သက်တမ်းအရင့်ဆုံး ရပ်ကွက်များဟု ဆိုနိုင်ပါသည်။ ရေ၊ မီး စသည် ထိုက်သင့်အားလျော်စွာ အခြေကျ ပြည့်စုံလေသည်။

သူ ပြင်ဦးလွင်တွင် သင်တန်းတစ်ခု တက်နေစဉ်တုန်းက ဆရာကြီး ဆင်ဖြူကျွန်းအောင်သိန်း၏ စာတစ်အုပ် ဖတ်ရပါသည်။ စာအုပ်အမည်မှာ “ပန်ချင်ရင် ပျို့မောင်ကြီးရယ် ခေါင်းဖြီးခဲ့လေး” ဟုထင်ပါသည်။ ထိုစာအုပ်တွင် ရေအင်မတန်ရှားသော ရွာတစ်ရွာမှ ရွာသူရွာသားများ ရေသမင်လိုက်သည့်အခန်း ပါပါသည်။ ဘယ်လောက်တောင် ရေရှားသလဲဆိုရင် သူတို့ခမျာ တစ်ခါတစ်ရံမှသာ မျက်စိလည်လမ်းမှားကာ ရွာချလာတတ်သော မိုးရေကိုပင် အလဟသ အဖြစ်မခံနိုင်ကြ။ မိုးကလည်း တစ်နေရာထဲတွင် သည်းသည်းမည်းမည်း ရွာနေတတ်သည်မဟုတ်။ မိုးတိမ်ညိုများက လေယူရာ တိမ်းရွေ့ပြီးလျှင် အခါသင့်သည့်နေရာ ရွာချတတ်သည်။ သည်တော့ သူတို့ခမျာလည်း ကလေးလူကြီး ကျားမမဟူ ပုံးတွေအိုးတွေယူကာ မိုးတိမ်တွေနောက် အပြေးလိုက်ကြရသည်။ မိုးရေကို ရတန်သမျှ စုရသည်။ ခေါင်းခုများ တဘက်များရေအစိုခံ၍ ညှစ်ချရသည်။ ရေတစ်ပုံး ရေတစ်အိုးအတွက် အလဲလဲအကွဲကွဲ၊ ပွန်းပဲ့ခြစ်ရှမိသဖြင့် သွေးတရဲရဲ ချွေးတရွှဲရွှဲ။ သူငယ်ချင်းတစ်ယောက်က သည်အခန်းကို ဖတ်ပြီး အံ့အားသင့်နေပုံရသည်။ သူကတော့၊ အော် ငါတို့ထက် ရေအတွက် ဒုက္ခရောက်နေရသူတွေ ရှိပါသေးလားဟု ဆင်ခြင်နေမိသည်။

ကစားကွင်းဘက်ဆီမှ ကလေးတွေအသံ ပျံ့လွင့်လာသည်။ စိတ်ချိန်သီးသည် ပစ္စုပ္ပန်ဆီသို့ ဖျတ်ခနဲ ရွေ့လျားလာပြန်သည်။ နေသည် စောစောကလောက် မပြင်းတော့။ ဖျော့ဖျော့အေးအေး နွေးရုံကလေးသာ။ ကစားကွင်းဘက်တွင် ပို၍ လူစည်လာသည်။ လူကြီးများက ခုံတန်းများတွင် နားနားနေနေ။ ကလေးများကတော့ မြူးတူးပျော်ရွှင်စွာ ဆော့ကစားနေကြသည်။ သူသတိပြုမိသည်မှာ သည်လို ကစားကွင်းလေးတွေ အများအပြားရှိနေခြင်းပင်။ သူ့အမြင်တော့ လူနေအဆောက်အဦနှင့် အချိုးကျညီမျှစွာ ကစားကွင်း၊ အပန်းဖြေနေရာ၊ မြက်ခင်းပြင်၊ သစ်ပင်ပန်းပင်တို့ကို စနစ်တကျ ထားပေးခြင်းဖြစ်မည် ထင်သည်။ တခါ လူနေရပ်ကွက်၊ လမ်းစသည်တို့နှင့် လိုက်လျောညီမျှစွာ သစ်ပင်တို့ကို ထိန်းသိမ်းစိုက်ပျိုးထားပြန်သည်။ မြက်ခင်းပြင်များ ပန်းစိုက်ခင်းများကိုလဲ နေရာတော်တော်များများတွင် တွေ့ရလေသည်။ ဥရောပမြို့ကြီးတစ်မြို့ ဆိုသော်လည်း သစ်ပင်တွေ ဒီလောက်များများကြီးတွေ့ရတော့ ရောက်စက သူအံ့သြမိသေးသည်။ ဗဟုသုတခေါင်းပါးသော သူ့အသိတွင် သည်လိုမြို့ကြီးတစ်မြို့သည် တိုက်တာအဆောက်အဦးတွေသာ မိုးထိုးပြွတ်သိပ်နေမည်ဟု ထင်ခဲ့မိသည်။ လူတို့သည် ရှားပါးလျှင် တန်ဖိုးထားထိန်းသိမ်းတတ်၍ ပေါများလျှင် မသိကျိုးကျွံ ပြုတတ်လေသလားဟုပင် မဆီမဆိုင် သူတွေးမိသည်။

သူတို့ မြန်မာကျောင်းသားများနေသော အထပ်သည် အတန်မြင့်သည်။ အပေါ်ဆုံးအထပ်တွေ ဖြစ်သည်။ ကိစ္စတော်တော်များများတွင် မြင့်သည်ကို သဘောကျတတ်ကြသော်လည်း အထပ်မြင့် အဆောင်များဆိုလျှင်တော့ နိမ့်လေ ပို၍နှစ်သက်လေ ဖြစ်မည်ထင်ပါသည်။ သည်မှာတော့ သစ်ပင်ကြီးငယ်အပေါင်းတို့သည် နွေရောက်ပါမှ ဖူးပုရစ်တို့ မြူးလှစ်ခွင့်ရကြသည်။ တစ်ဆောင်းတွင်းလုံး ၀ှက်သိမ်းခဲ့ရသော ၀တ်ရုံအစိမ်းများကို ခြုံလွှမ်းခွင့် ရကြသည်။ အတန်မြင့်မားသော အထပ်ဖြစ်ရာ မြို့ကို အပေါ်စီးမှ မြင်ရလေသည်။ စိမ်းစိုနေသော တောအုပ်ငယ်လေးများကို နေရာအနှံ့ ခပ်စိပ်စိပ်တွေ့ရသည်။ ကျောင်း၏ ညာဘက်ယွန်းယွန်း ကာလော်မင်စကာရာ ပန်းခြံကြီးထဲတွင် မော်စကိုမြစ်သည် အပိုင်းပိုင်း ပြတ်တောက်နေသည်။ စိမ်းမြသောတောအုပ်များနှင့် ပန်းသီးပင်ပျိုတို့က ပုန်းလျှိုးကွယ်လျှိုး ပြုထားရာ မြစ်သည် အတစ်တစ် ပြတ်တောက်နေသကဲ့သို့..။ ဖွေးဖွေးဖြူသော မြစ်ရေသည် စိုလွင်သော မြသားပြင်တောအုပ်နှင့် ပနံရလှပါသည်။ ဖွေးဖွေးဖြူသောရေ။ ရေက ဖွေးဖွေးဖြူနေ။ အမှန်အားဖြင့် ရေသည် ရေသာဖြစ်လေသည်။

လူတို့၏ အခြေခံလိုအပ်ချက်များတွင် ရေနှင့်မီးသည် အဓိက ဇာတ်ကောင်များဖြစ်မည် ထင်ပါသည်။ စားဝတ်နေရေး အမှုကြီးသုံးပါးအတွက်လဲ ရေနှင့်မီးသည် မသေးသောကဏ္ဍမှ ပါဝင်ကြပြန်သည်။ ထိုမျှ အရေးပါအရာရောက်သော ရေနှင့်မီး ပုဂ္ဂိုလ်ကြီးနှစ်ဦးကို ပမာမခန့် မပြုကောင်းပြီ။ လူနေအဆောက်အဦများ၊ မြို့အကွင်းအကွက်များ အသစ်မွေးဖွားလိုသော် ရေနှင့်မီးသည် နို့စို့ဖက်တော့ ဖြစ်တန်ကောင်းမည် ထင်ပါသည်။ ချက်ကြိုးဖြတ်သလို ဖြတ်ချထားခဲ့ဖို့တော့ မကောင်းပါလေ။

သူသည် နွေဦးကို ချစ်သည်။ ချစ်သဖြင့် လွမ်းရသည်။ လွမ်းရတော့ တမ်းတမိသည်။ သူ့ နွေဦးဝေဒနာသည် အတော်ရင့်ချေပြီ။ အော်၊ အောက်မေ့စွဲလမ်းရပါသော နွေဦး။ နွေဦးသည် နှစ်မျိုးနှစ်စား မရှိစကောင်း။ သည်နွေဦးကတော့ဖြင့် လှသည်၊ ဟိုနွေဦးကတော့ မလှဟု အဆင့်အတန်းခွဲရန် မလိုအပ်။ နွေရာသီ ကျောင်းပိတ်ရက်တလျှောက် ရေမုဆိုးလုပ်နေသော ကလေးတစ်ယောက်၏ နွေဦးတွင်လည်း ပန်းများလှိုင်လှိုင်ပွင့်ဝေ စေချင်မိရုံသာ သူ ဆန္ဒပြုမိလေသည်။

ညိမ်းညို

လွမ်းလို့ ဆွံ့အသွားတဲ့ ကြယ်

ပုံကို ဆြာညိန်း ဆွဲပေးပါတယ်

လွမ်းလို့ ဆွံ့အသွားတဲ့ ကြယ်

လွမ်းလို့ ဆွံ့အသွားတဲ့ကြယ်ဆိုတာ တကယ်ရှိလို့လား
တအံ့တသြပဲ ကြည့်မိတယ်
သူက စကြာဝဠာကြီးတစ်ခုလုံးမှာ
ချစ်သူမျက်နှာတခုသာ ရှုစရာအမှတ်နဲ့
တွဲထားသည်ဖြစ်စေ ခွဲသွားသည်ဖြစ်စေ
သိစိတ်ထဲမှာရော မသိစိတ်ထဲမှာရော
ဒါကိုပဲ အဖန်ဖန်အထပ်ထပ် ရှုလို့
သူ့တစ်ကိုယ်လုံး အလွမ်းဓာတ်တွေ ပျံ့နှံ့ပြီး
ဆွံ့အသွားတဲ့ ကြယ်တစ်လုံးသာ ဖြစ်တယ်။

ညိမ်းညို

ကန္တာရမှာ ရွာတဲ့မိုး

(၁)
ကျွန်တော့်ဘ၀တွင် လွမ်းဆွတ်ကြည်နူးရသော နေ့ရက်များကို ပြပါဆိုလျှင် သက်ကယ်ခြံရွာကလေးသို့ လုပ်အားပေးဆရာအဖြစ် သွားရောက်ခဲ့ရသော နေ့ရက်များကို ညွှန်းဆိုရပါလိမ့်မည်။ သက်ကယ်ခြံရွာကလေးသည် ဖုန်းဆိုးမြေ ကျတ်တီးကုန်းကြားတွင် ထီးတည်းတည်ရှိနေပါသည်။ လမ်းပန်းဆက်သွယ်ရေးက မကောင်း၊ မြို့ကြီးပြကြီးနှင့်လည်း မနီး၊ အလွန်ဝေးလံသီခေါင်သော ရွာကလေးဖြစ်သည်။ ဒေသထွက်ကုန်ဟူ၍ ပြောပလောက်အောင် ဘာမှမရှိ။ ဖုန်းဆိုးမြေရိုင်းကြီးများ ကြီးစိုးနေသဖြင့် ဆန်စပါး၊ ပဲနှမ်း အစရှိသည်တို့ စိုက်ပျိုး၍မရ။ သည်ကြားထဲ မိုးခေါင်သေး၏။ ရေရှားသေး၏။ ကျတ်တီးကုန်းများကလည်း ပေါမှပေါ။ သည်တောသည်တောင် သည်အခြေအနေမျိုးနှင့် သက်ကယ်ခြံရွာကလေး အဘယ်မှာလျှင် ခေါင်းထောင်နိုင်ပါအံ့နည်း။

သို့သော် ချီးကျူးဖွယ်ရာပင်။ သည်မျှ အခြေအနေဆိုးသော ရွာကလေးတွင် မူလတန်းကျောင်း ရှိသည်။ ရပ်မိရပ်ဖများ၏ အမြော်အမြင်ရှိမှုဟု ဆိုရပါမည်။ ရွာရှိဘုန်းတော်ကြီး ကျောင်းဝင်းထဲတွင် တွဲဖက်၍ ဖွင့်ထားခြင်းဖြစ်သည်။ အိမ်ခြေ ၅၀ သာသာမျှရှိသော ရွာကလေးတွင် မူလတန်းကျောင်းတစ်ကျောင်းကို မဖြစ်ဖြစ်အောင် ထောက်ပံ့ထားနိုင်သည်မှာ တော်ရုံသတ္တိမျိုးနှင့် မဖြစ်နိုင်ပါ။ တစ်ရွာလုံးက သည်ကျောင်လေးကို အမြတ်တနိုး တန်ဖိုးထားကြ၍သာ ဖြစ်သည်။ ရွာကလေး၏ အနာဂတ်အတွက် သည်ကျောင်းလေးကို အားကိုးအားထား ပြုကြသည်။ သူတို့ သားသမီးတွေကို ပညာတတ်ကြီးတွေဖြစ်လာအောင် သည်ကျောင်းလေးက စွမ်းဆောင်ပေးနိုင်လိမ့်မည်ဟု အပြည့်အ၀ ယုံကြည်ကြသည်။ သည်ရွာကလေးမှမိဘများ ပညာရေးကို အရေးပေး အလေးထားကြသည်မှာ နှစ်လိုဖွယ် ကောင်းလှပါသည်။

ဖြစ်ချင်တော့ ကျွန်တော့အစ်ကိုသည် ပညာရေးကောလိပ်မှ ဆင်းလျှင်ဆင်းချင်း သည်ကျောင်းလေးမှာ တာဝန်ကျသည်။ ကျောင်းဆရာဘ၀ကို နဖူးတွေ့ဒူးတွေ့ သိရှိကာစ သည်ကျောင်းလေးကို ရောက်သွားရသည်ဆိုတော့ အစ်ကိုလည်း အတော်လေး အီစလံဝေသွားသည် ဆို၏။ သို့သော် အစ်ကိုက စိတ်ဓာတ်ကျခြင်း၊ စိတ်ကုန်စိတ်ပျက်ခြင်း အလျဉ်းမရှိ။ မိမိကိုယ်တိုင် ၀ါသနာပါလွန်း၍ ရွေးချယ်လျှောက်လှမ်းခဲ့သော လမ်းပေပဲ။ တွေ့ကြုံလာသမျှ အခက်အခဲတွေကို ရယ်ရယ်မောမော ရင်ဆိုင်ဖြေရှင်းသည်။ ဆောင်ရွက်စရာရှိသည်တို့ကို တက်တက်ကြွကြွ၊ ပျော်ပျော်ရွှင်ရွှင် လုပ်ကိုင်သည်။ ပြုပြင်စရာ ရှိသည်တို့ကို ပြတ်ပြတ်သားသား ပြုပြင်သည်။ အစ်ကိုရောက်သွားပြီး မကြာမီလပိုင်းအတွင်းမှာပင် ကျောင်းကလေးက သိသိသာသာ တိုးတက်ပြောင်းလဲလာသည်။ ကျောင်းကလေးနှင့် ရွာကလေးမှာ အပြန်အလှန် အမှီသဟဲပြုကာ သဟဇာတကျကျ ညီညွှတ်လှပစွာ စည်ပင်ဖွံ့ဖြိုးလာသည်။

နွေကျောင်းပိတ်၍ အိမ်ပြန်လာသည့်အစ်ကိုက သည်အကြောင်းတွေကို အားရ၀မ်းသာ ပြောပြပါတော့သည်။ သူက အားတက်သရောနဲ့ စိတ်ဝင်စားအောင်လဲ ပြောတတ်လေတော့ ရွာကလေးဆီကို မရောက်ဖူးပါဘဲနဲ့ ကျွန်တော့်စိတ်ထဲတွင် မှတ်မှတ်ထင်ထင် ဖြစ်ရသည်။ ကျောင်းကလေးကိုလဲ စွဲစွဲလမ်းလမ်း ချစ်ခင်နေမိသည်။ ထိုစဉ်က ကျွန်တော်ဆယ်တန်းဖြေပြီးစ၊ အလုပ်ဟူ၍ မယ်မယ်ရရမရှိသေးဘဲ ယောင်လည်လည် ဖြစ်နေသည့်အချိန်။ အကိုကပဲ အပြောကောင်းလို့လား၊ ကျွန်တော့်စိတ်ကပဲ ညွှတ်နေလို့လားဆိုတာ ဝေခွဲမရ။ နောက်ဆုံးတွင်မူ ကျောင်းပြန်ဖွင့်၍ အစ်ကိုပြန်လျှင် ကျွန်တော်လည်း တပါတည်းလိုက်သွားရန် ဆုံးဖြတ်လိုက်ပါတော့သည်။

+++

(၂)
ကျွန်တော် အစ်ကိုနှင့် လိုက်သွားမည့်အကြောင်း အမေ့ကိုပြောပြတော့ အမေက "သားငယ် ဖြစ်ပါ့မလား" တဲ့။ အမေသည် အရာရာကို တွေးတွေးဆဆ ပြောလေ့ရှိသည်။ နောက်တစ်ကြောင်းက အမေဆိုသည်မှာ သူတို့သားသမီးတွေကို ဘယ်အချိန် ဘယ်အရွယ်ရောက်ရောက် စိတ်မချနိုင်၊ စိုးရိမ်ပူပန်တတ်စမြဲပေကိုး။ အခုလည်း တနယ်တကျေး အလွန်ဝေးတဲ့အရပ်ဒေသကို လိုက်သွားရမှာဆိုတော့ ကျွန်တော့ကို စိတ်ချဟန်မတူ။ အစ်ကို့ကိုသာ တာဝန်နဲ့မို့ မတားသာ၍ လွှတ်ထားရဟန် ရှိပါသည်။ သို့ပေမဲ့ ကျွန်တော်က အိမ်မှာ အငယ်ဆုံးသားဆိုတော့ အမေ့ကို နှစ်ခါမပြောရ။ အမေ့ရင်ခွင်ထဲ တိုးဝင်ခေါင်းခွေ့၍ အပူကပ်ဂျီကျလိုက်လျှင် အမေ အလျော့ပေးရမြဲ။ ကျွန်တော့်အလိုသို့ လိုက်ရမြဲ။

နောက်ဆုံးတော့ ကျွန်တော့်ဆန္ဒအတိုင်းပါပဲ။ အစ်ကိုနှင့်အတူ လိုက်ပါခွင့် ရခဲ့ပါသည်။ ကျွန်တော်လည်း အမေ့ဆီက ခွင့်ပြုချက်ရတာနဲ့ မူလတန်းကျောင်းသားဘ၀တုန်းက သင်ကြားခဲ့ရသော ပြဌာန်းစာအုပ်များကို အသေအချာ ပြန်ဖတ်ရပါတော့သည်။ တော်ပါသေးရဲ့။ အမေက ပြဌာန်းစာအုပ်တွေကို နှစ်အလိုက် တရိုတသေ သိမ်းထားပေးတာမို့ ထိုစာအုပ်များကို အကောင်းပကတိ သပ်သပ်ရပ်ရပ် ပြန်တွေ့ရသည်။ စာတွေပြန်ဖတ်ရသည် ဆိုခြင်းမှာ အကြောင်းရှိပါသည်။ လိုအပ်လျှင် ကျွန်တော်က ကလေးတွေကို စာသင်ပေးဦးမည်လေ။ အစ်ကိုကလည်း ကျွန်တော့်ကို ရဲဆေးတင် တိုက်တွန်းအားပေးထားပေသကိုး။

သည်လိုနဲ့ အစ်ကိုလည်း ခွင့်ရက်ပြည့်သွားပြီ။ တစ်နိုင်ငံလုံးမှ ကျောင်းတံခါးတွေသည်လည်း သုံးလတတိတိ အနားယူနေရာမှ ပြန်လည်ဖွင့်လှစ်ကြတော့မည်။ အညောင်းအညာ ဆန့်ကုန်ကြပြီ။ လေးလံထိုင်းမှိုင်းသော စိတ်တို့ကို ခ၀ါချလျက်၊ ညစ်ညူးသောစိတ်တို့ကို သန့်စင်လျက် ၀င်လာသမျှ မျိုးဆက်သစ်ကလေးတွေကို ကြည်ကြည်နူးနူး ပြုံးပျော်မြူးစွာဖြင့် ကြိုဆိုကြပေတော့မည်။ သူတို့၏ ပညာရင်ခွင်ကို နွေးထွေးစွာ ဖွင့်လှစ်ကြိုဆိုကြပါတော့မည်။

မနက်ဖြန်ဆို အစ်ကိုနှင့်အတူ သက်ကယ်ခြံရွာကလေးသို့ လိုက်ပါသွားရတော့မည်။ သက်ကယ်ခြံရွာလေးရှိ မူလတန်းကျောင်းကလေး၏ ပညာရင်ခွင်တံခါးကို ကြင်နာသောနှလုံးသားဖြင့် တိုးဝင်ဖွင့်လှစ်ရပါတော့မည်။

+++

(၃)
အဲသည်ညက ကောင်းကောင်း အိပ်လို့မပျော်။ ဟိုတွေးသည်တွေးနှင့် မျက်လုံးတွေ ကြောင်နေသည်။ ပြတင်းပေါက်ဖွင့်ထားသဖြင့် အခန်းတွင်းဝယ် လရောင်သည် လင်းလင်းချင်းချင်း။ အစ်ကိုကတော့ အိပ်ပျော်နေပါပြီ။ နွေမကုန်တတ်သေး၍ ရာသီက အိုက်စပ်စပ် ရှိလှသည်။ စွပ်ကျယ်လက်ပြတ်ဖြင့် အိပ်နေသော အစ်ကို့မျက်နှာဝယ် ချွေးဥလေးတွေ သီးနေသည်။ မတတ်သာ၊ နှုတ်မှ "ကန်တော့..ကန်တော့" ဟုရေရွတ်တောင်းပန်၍ အစ်ကို့အပေါ်မှ ကျော်ခွကာ အခန်းအပြင်ဘက် ထွက်ခဲ့သည်။ အိမ်ရှေ့လက်ရန်းမှာ ထွက်ရပ်ရင်း ဘာလုပ်ရမှန်းမသိဘဲ ယောင်ပေပေဖြစ်နေရာမှ ခြံထဲဆင်းရန် အကြံပေါ်လာသည်။

ခြံထဲရောက်သော် လမွန်းတည့်တော့မည်။ သော်တာလမင်းကြီးသည် ကျွန်တော့်ဦးခေါင်းထက်တွင် ထိန်ထိန်သာလျက်။ ညမွှေးပန်းလေးတို့၏ ရနံ့သည် သင်းပျံ့ စွာ မွှေးကြူနေသည်။ ညဥ့်လယ်ယံလေပြေသည် အရွက်စိပ်သော အုန်းလက်များနှင့် ငှက်ပျော်ရွက်ဖားဖားကြီးများကို တဖျောဖျော တိုက်ခတ်နေသေးတော့။ ည၏ရှုခင်းသည် ကြည်နူးဖွယ်ရာပင်။ ရှဥ့်ကလေးနှစ်ကောင်သည် ကျွန်တော့်အသံ ကြား၍ထင့်။ စံပယ်ခြုံခြေရင်းမှသည် အုန်းပင်ထိပ်ဖျားသို့တိုင် တမဟုတ်ချင်း ပြေးတက်သွားသည်။ ကျွန်တော်လည်း ကျောက်စည်ပိုင်းအပြတ်ကြီးပေါ် ထိုင်ချလိုက်ပြီး ည၏အလှကို တ၀ကြီး ငေးကြည့်နေလိုက်တော့သည်။

မနက်ဖြန်ဆိုလျှင် ကျွန်တော်သည် မရောက်ဖူးသော အရပ်ဒေသကို ရောက်ရတော့မည်။ မမြင်ဖူးသော ကျောင်းကလေးကို မြင်ရတော့မည်။ မတွေ့ဖူးသော ကလေးတွေကို တွေ့ရတော့မည်။ အို..တွေ့ရုံမျှ မကပါလေ။ စာပါ သင်ပေးရဦးမည်။ အတွေးတွေက အမျှင်မပြတ်၊ ကြွက်မြီးတန်းသလို တန်းနေသည်။ ကြုံတွေ့ရမည်တို့ကို ကြိုတင်ခံစားရင်း စိတ်ထဲမှာ ပျော်သလိုလို ကြည်နူးသလိုလို၊ လွမ်းပဲလွမ်းမိသလိုလို။ ဘယ်နှယ့်ကြီးမှန်းမသိ၊ အမျိုးအမည်တပ်၍ဖော်ပြရန် ခက်လှပါ၏။

ကျွန်တော်ထိုင်နေလိုက်သည်မှာ ဘယ်လောက်တောင် ကြာသွားလေပြီမသိ၊ အစ်ကိုက ကျွန်တော့်ကို ၀ရန်တာပေါ်မှ လှမ်းခေါ်နေသည်။ လသည် အနောက်သို့ ခပ်ယိုင်ယိုင် နိမ့်ဆင်းသွားပြီ။ ကျွန်တော်ကမူ တွေး၍ကောင်းဆဲ..။ ကျွန်တော့်အတွေးတို့သည် အချိန်ကြာလာသည်နှင့်အမျှ ကြည်လင်ပြတ်သားလာ၏။

ပျော်စရာကောင်းပါဘိတောင်း။ မိမိတတ်စွမ်းသမျှ ပညာပါရမီ ဖြည့်ဆည်းရခြင်း၊ ပညာဒါနပြုရခြင်းဟူသည် အဓိပ္ပါယ်ပြည့်ဝလေးနက်၍ အနှစ်သာရအားဖြင့်လည်း ပြည့်လျှမ်းနေသည် မဟုတ်ပါလား။

+++

(၄)
ညက အိပ်ရာဝင်နောက်ကျသဖြင့် အချိန်မီမနိုး။ ၀ီရိယကောင်းလှသောအစ်ကိုက အားလုံးအသင့်ပြင်ပေးထားသည်။ လိုအပ်သော ခရီးဆောင်အိတ်များ၊ စားသောက်စရာ အကြော်အလှော်ဗူးများ၊ စာအုပ်စာတမ်းများအားလုံးကို နေသားတကျ ပြင်ဆင်ထုပ်ပိုးပြီးမှ ကျွန်တော့်ကို လာနှိုးပါသည်။ ထိုအခါမှ ကျွန်တော်လည်း မျက်နှာ ကဗျာကသီသစ်၍ တပိုတပါး သွားရသည်။ အားလုံးပြီးသွားတော့ အစ်ကိုက မီးဖိုချောင်ထဲမှ လှမ်းခေါ်သည်။ ပူပူနွေးနွေး ထမင်းကြော်တွေကို ဇလုံနှင့် အမောက်ကြီးတွေ့ရသည်။ ဓာတ်ဗူးထဲက အဖန်ရည်မှာလည်း ကောင်းကောင်းကြီး ကျနေပြီ။ အစ်ကိုသည် မစားနှင့်သေးဘဲ ကျွန်တော့်ကို စောင့်နေခြင်းဖြစ်သည်။ ကျွန်တော်တို့ညီအစ်ကို ထမင်းစားနေတုန်း ဦးကြီးသန်းအောင်က လှည်းကနေသည်။ အမေလည်း ဘုရားဝတ်ပြုပြီး၍ မီးဖိုချောင်ထဲသို့ ဆင်းလာသည်။

ကျွန်တော်။ ထမင်းကြော်ကတော့ ဂွတ်ရှယ်ပဲအမေရာ၊ ပဲပြုတ်လေးကလဲ မွှေးပီး ဆိမ့်နေတာပဲ..။

အမေ။ (ညင်ညင်သာသာပြုံးလျက်) စားပါကွယ်။ စားတော်ပဲမရတော့ ပဲနီပြားလေးနဲ့ ကြော်လိုက်ရတယ်၊ အမေက ငါ့သားတို့ ခံတွင်းမှ တွေ့ပါ့မလားလို့..၊ ကဲ သားကြီးရေ မင်းတို့နေမြင့်နေဦးမယ်နော်။

အစ်ကို။ (ထမင်းကြော်ဇလုံကို လက်စသတ်လျက်) ဟုတ်ကဲ့ အမေ၊ ကျွန်တော်တို့ သွားတော့မယ်ဗျ၊ ဖိုးကျော်ရေ..အမေ့ကို ကန်တော့ရအောင်။

ကျွန်တော်တို့ ညီအစ်ကိုနှစ်ဦး အမေ့ကို ဦးချကန်တော့ကြသည်။ "အမေ့သားတွေ ဘေးအန္ထရာယ်ကင်းရှင်းပါစေ၊ ခလုတ်မထိ ဆူးမငြိပါစေနဲ့" ဆိုသော ဆုပေးသံကို ကြားနေရသည်။ အမေသည် နှုတ်မှ တတွတ်တွတ် ရွတ်ဆိုဆုပေးနေသော်လည်း မျက်လုံးအိမ်တွင်မူ မျက်ရည်တို့ ရစ်သိုင်းနေရှာသည်။ သံယောဇဉ်နှင့် မေတ္တာ၏ အရိပ်အငွေ့တို့သည် အမေ့မျက်ဝန်းအိမ်ဝယ် ဝေ့၀ဲတွဲခိုနေကြလေပြီ။ သူ၏အသက်နှင့်တူသော သားနှစ်ယောက်စလုံး သူနှင့်ဝေးရာ တနယ်တကျေးသို့ သွားရတော့မည်ကို အမေသည် မလွမ်းဘဲ နေပါမည်လား။

ဦးကြီးသန်းအောင်က လှည်းကပြီးကြောင်း၊ ပစ္စည်းတွေတင်ပြီးကြောင်း လှမ်းပြောသည်။ အစ်ကိုက အမေ့ကို နှုတ်ဆက်ကန်တော့ပြီး အပြင်ထွက်နှင့်သည်။ အမေက ကျွန်တော့်ဦးခေါင်းကို ဖွဖွကိုင်လျက် "သားငယ်..မင်းအစ်ကိုစကားကို နားထောင်နော်၊ အစ်ကိုကြီး အဖအရာတဲ့၊ သူတစ်ပါးရပ်ရွာမှာ လိမ်လိမ်မာမာနေနော်၊ အများအကျိုးကိုလဲ တတ်စွမ်းသလောက်လုပ်ခဲ့၊ သားငယ်ပြန်လာရင် အဲသည်အကြောင်းတွေ အမေ့ကို ပြောပြနော်၊ ကိုင်း..ကိုင်း သွားကြတော့ကွဲ့၊ လမ်းမှာ နေပြင်းနေအုံးမယ်" ဟု မှာရှာပါသည်။ အတန်းပညာလေးတန်းမျှသာ ရှိရှာသောအမေက ကျွန်တော်တို့ ညီအစ်ကိုနှစ်ယောက်ကို ပညာတတ်ကြီးတွေ ဖြစ်စေချင်လွန်းလှသဖြင့် အဖေမရှိတော့သော်ငြား ကြိုးစားရုန်းကန်၍ ကျောင်းထားပေးခဲ့သည့်အပြင် သည်သို့သော ဆုံးမစကားများဖြင့် သွန်သင်ပြောဆိုလေသောအခါ အမေ့ကို တိုး၍ ကြည်ညိုလေးစားမိပါသည်။

ကျွန်တော်တို့ လှည်းထွက်ခဲ့သည့်တိုင် အမေသည် လှည်းနောက်မြီးကို ငေးကြည့်နေရှာ၏။ အမေ့မျက်နှာ ဘယ်သို့ရှိရှာမည်နည်း။ အရုဏ်ကျင်း၍ အလင်းမပျို့မီ မှောင်ရီမှောင်ဝါး အချိန်လေးတွင် တဘက်ခေါင်းပေါင်းထားသော အမေ့မျက်နှာကို ကျွန်တော် သဲကွဲစွာ မမြင်ရတော့ပြီ။ သို့သော် အမေပြုံးနေပါလိမ့်မည်။ ရင်မှဖြစ်သောသားများကို ခွဲရ၍ မချိသော်ငြား အမေပြုံးနေပါလိမ့်မည်။ အမေသည် သူ့သားများကို ပညာတတ်စေချင်သလို အခြားတစ်ပါးသော သူတို့၏ သားသမီးများကိုလည်း ထပ်တူထပ်မျှ ပညာတတ်စေလိုသူလေ။ သားကြီးက အစိုးရခန့် ကျောင်းဆရာ၊ သားငယ်က လုပ်အားပေး ကျောင်းဆရာပေါက်စလေးလုပ်ဖို့ သွားသည်ဆိုတော့ အမေပြုံးနေမှာပဲပေါ့..။

+++

(၅)
စိုင်ပြင်ဈေးသို့ရောက်သော် လက်ဖက်ရည်ဆိုင်တစ်ဆိုင်မှ ကားစောင့်ကြသည်။ ဦးကြီးသန်းအောင်က လှည်းဦးထောက်၍ နွားများကို ဆိုင်နောက်ရှိ တမာပင်၌ သွားချည်ထားသည်။ အိမ်အတွက် လိုအပ်သောပစ္စည်းပစ္စယများ ၀ယ်ခြမ်းပြီးလျှင် ဦးကြီးက ရွာကိုပြန်တော့မည်။ ကျွန်တော်တို့ ညီအစ်ကိုကမူ ကားဖြင့် ခရီးတစ်တန် ဆက်ရဦးမည်ဖြစ်သည်။ ကျွန်တော်က အစ်ကို့ထံမှ ပိုက်ဆံတောင်း၍ အမေကြိုက်တတ်သော မုန့်တီလက်သုပ် တစ်ပွဲဝယ်ပြီး ဦးကြီးသန်းအောင်ကို ပေးလိုက်သည်။ ဆယ်တန်းအောင်စာရင်းများ ထွက်ချိန်တွင် ကျွန်တော်ပြန်လာမည့် အကြောင်းကိုလည်း အမေ့ဆီ မှာရသေးသည်။ အစ်ကိုကတော့ စိတ်မပူဖို့၊ သူ့ညီလေးကို သေသေချာချာ ဂရုစိုက်ပါမည့်အကြောင်းလောက်သာ မှာသည်။ အစ်ကိုသည် သူ့ကျောင်းကိစ္စမှလွဲလျှင် စကားနည်း၍ အနေအေးသည်ပဲ။ ပြောပြီဆိုလျှင်လည်း စိတ်ပါလက်ပါနှင့် တစ်ဖက်သား နားဝင်လွယ်အောင် ပြောနိုင်စွမ်းရှိသူ ဖြစ်သည်။

ကျွန်တော်။ အစ်ကို ကျွန်တော့်ကို ပိုက်ဆံနည်းနည်းလောက်ပေးပါဦးဗျ။

အစ်ကို။ ဘာစားချင်လို့လဲ ဖိုးကျော်ရ၊ ဗိုက်ဆာနေပလား။

ကျွန်တော်။ မဟုတ်ပါဘူး အစ်ကိုရာ၊ ၀ယ်စရာလေး ရှိလို့ပါ။

အစ်ကို။ (ပြုံးလျက်) ပြောလေကွာ၊ အစ်ကိုဝယ်ပေးမှာပေါ့..။

ကျွန်တော်။ တန်ဖိုးမနည်းမများ ဗလာစာအုပ်နှစ်ဒါဇင်လောက်နဲ့ ခဲတံတစ်ဒါဇင်လောက် ၀ယ်ချင်လို့ အစ်ကိုရ။

အစ်ကို။ (အတန်ငယ် စဉ်းစားနေပြီးမှ သဘောပေါက်သွားဟန်ဖြင့်) ကောင်းပါလေ့ကွာ၊ အစ်ကိုဝယ်ပေးပါ့မယ်ဗျာ။

ကျွန်တော်တို့ စာအုပ်များ ၀ယ်ပြီးချိန်တွင် ကားရောက်လာသဖြင့် ခရီးဆက်ကြရပြန်သည်။ ခရိုင်မြို့ကြီးတစ်မြို့ဆီသို့ ကားဖြင့် ၃ နာရီခန့်ကြာအောင် သွားကြရသည်။ ထိုမှတဖန် နယ်မြို့လေး တစ်မြို့ဆီသို့ ၂ နာရီခန့်မျှကြာအောင် ကားစီးရပြန်သည်။ ထိုမြို့သို့ရောက်သောအခါ အစ်ကိုက ပညာရေးမှူးရုံးသို့ဝင်၍ အကျိုးအကြောင်း သတင်းပို့သည်။ ကိစ္စ၀ိစ္စအားလုံး ပြီးစီးလတ်သော် ညနေစောင်းချေပြီ။ ညနေ ၃ နာရီသာသာတော့ ရှိပေရော့မည်။ ထိုမှတပြီးကား လမ်းခုလတ်ရှိ ကြားရွာကြီးတစ်ရွာသို့ မြင်းလှည်းစီး၍ သွားရပြန်ပါသေးသည်။ ထိုရွာကြီးသည် ချောင်းနဖူးပေါ်တွင် အလျားလိုက် သွယ်တန်းတည်ရှိနေသော ရွာတန်းရှည်ကြီးဖြစ်သည်။ ကိုင်းများ ထူထပ်စွာပေါက်ရောက်နေပြီး ထန်းပင်ညို့ညို့များကို ဟိုသည်ဝဲယာ မြင်တွေ့ရသည်။ သီးနှံစိုက်ခင်းများ၊ ဥယျာဉ်များ စိုက်ပျိုးဖြစ်ထွန်းနေသည်ကိုလည်း တွေ့ရသည်။ ဤရွာကြီးတွင် စီးပွားရေးကောင်းမွန်သော လက္ခဏာများကို တွေ့ရသဖြင့် အစ်ကိုတာဝန်ကျသည့် သက်ကယ်ခြံရွာကလေးသို့ ရောက်ရန်လိုသေးကြောင်း ခန့်မှန်းမိသည်။ အစ်ကိုက ချောင်းကမ်းပါးတစ်နေရာတွင် မြင်းလှည်းကို ရပ်စေ၍ ကျသင့်သော အဖိုးအခပေးသည်။ ပြီးသော် ခဲရာခဲဆစ်ဖောက်ထားသော လူသွားလမ်းကေလေးအတိုင်း အထုပ်အပိုးများကို သယ်ဆောင်ကာ ရေစပ်သို့ ဆင်းသွားလေသည်။ ကျွန်တော်သည်လည်း ကိုယ်ရှိန်ထိန်း၍ အသာလိုက်သွားရသည်ပေါ့။ လှေဆိပ်သို့ရောက်သော် ထွက်တော့မည့် လှေတစ်စင်းကို အခန့်သင့်ပင် တွေ့ရလေသည်။

လှေသမား။ အတော်ပဲဗျို့ ..၊ ဒီအချိန်မျိုးက ခရီးသည်တယ်ပါးတာကလား၊ ကျုပ်လည်း မစောင့်နိုင်ဘဲ ထွက်တော့မလို့၊ ဘယ်တုန်းဗျို့ ၊ ဇီးကုန်းလား၊ သရက်ကန်လား။

လှေသမားကြီးက ၀ါးခမောက်ကို ခပ်ငိုက်ငိုက်ဆောင်း၍ အနည်းငယ်မြင့်သော ကမူပေါ်ရှိ ကျွန်တော်တို့ ညီအစ်ကိုနှစ်ယောက်ကို လှမ်းအော်ပြောသည်။

အစ်ကိုကပြုံးလျက် "ဗျို့ ၊ ဦးဘထိုက်ကြီး၊ ကျွန်တော်ပါဗျ၊ ဘယ့်နှယ်..မမှတ်မိတော့ဘူးလား"

ဦးဘထိုက်ဆိုသော လှေသမားကြီးမှာ အစ်ကို့အသံကို ကြားလျှင်ကြားချင်း ၀ါးခမောက်ကို ဆတ်ခနဲပင့်လျက် တစ်ချက် လှန်ကြည့်လိုက်ပါသည်။ ပြီးသော် အလွန်ဝမ်းသာသွားဟန်ဖြင့် ပါးစောင်တွင် ကပ်ထားသောကွမ်းကို ထွီခနဲထွေးထုတ်၍ တစ်ကတည်း အစ်ကို့ကို ပြေး၍ဖက်တော့မတတ် ကမူလေးဆီသို့ တမဟုတ်ချင်း ပြေးတက်လာပါတော့သည်။

"ဟာ..ဆရာဇော်၊ ၀မ်းသာလိုက်တာဗျာ၊ ကျုပ်တို့က ဆရာဇော်စိတ်ကုန်ပြီး ထွက်စာများတင်လိုက်ပလား အောက်မေ့နေကြတာ၊ ပေး ပေး..အထုပ်တွေကျုပ်ကိုပေး၊ နောက်ကျသဗျာ၊ မိုးတောင်ချုပ်တော့မယ်၊ ဆရာဇော်တို့ လမ်းမှာ အတော်ကသီခဲ့ထင်ပ"

လှေသမားကြီး ဦးဘထိုက်က ပြောပြောဆိုဆိုပင် အစ်ကို့ထံမှ အထုပ်အပိုးများကို ဆွဲယူ၍ လှေပေါ်တင်ပါတော့သည်။ အစ်ကို့ကို ဆက်ဆံနေပုံမှာလည်း ဟန်ပန်မရှိ၊ ပကတိ ရိုးစင်းလှပါသည်။ အစ်ကို့ကို အလွန်ကျေးဇူးတင်နေဟန်လည်း ရှိပါသည်။ တရိုတသေ လှိုက်လှိုက်လှဲလှဲ ဆက်ဆံနေခြင်း ဖြစ်သည်။ အစ်ကို့အသက်မှာ အလွန်ဆုံးရှိလှ ၂၅ ထက်မပိုပါ။ လှေသမားကြီး ဦးဘထိုက်မှာ အသက် ၄၀တော့ ကျော်ပေရော့မည်။ ၅၀ပင် ရှိလေမလား မပြောတတ်။ သို့သော် သူ၏တူသားအရွယ်မျှရှိသော အစ်ကို့ကို တလေးတစား ပြောဆိုပါသည်။ ၀မ်းပန်းတသာ ကြိုဆို၍ တရိုတသေ ဆက်ဆံနေပါသည်။ အစ်ကိုသည် တစ်နှစ်တာကာလအတွင်းမှာ သည်ရွာလေးအကျိုး ဘာတွေ သယ်ပိုးခဲ့ပါသနည်း။ ကျွန်တော့်အဖို့ ပဟေဠိဆန်လှချေ၏။ အစ်ကို့ကိုသာ နားမလည်နိုင်စွာ ငေးကြည့်နေမိတော့သည်။ ဦးဘထိုက်က ကျွန်တော့်ဆီမှ အထုပ်အပိုးများကိုလည်း ကူညီနေရာချပေးပါသည်။

ဦးဘထိုက်။ ဆရာဇော် ညီလေးလား၊ ဆရာဇော်နဲ့ ရုပ်ချင်းက တော်တော်ပဲ ဆင်သကိုး၊ ပေး ပေး..လူလေးပစ္စည်းတွေ ဦးကြီးကိုပေး။

အစ်ကို။ ဟုတ်တယ်ဦးဘထိုက်ရေ၊ ကျွန်တော့်ညီလေးဗျ၊ ကျော်ကျော်တဲ့၊ အခု ဖိုးကျော်က ဆယ်တန်းဖြေထားတာ၊ ကျွန်တော်နဲ့ လိုက်ချင်တယ်ဆိုတာနဲ့ ကျောင်းပိတ်တုန်း ခေါ်လာတာဗျ၊ အတွေ့အကြုံလည်း ရအောင်ပေါ့ဗျာ။

ဦးဘထိုက်။ ပင်ပန်းပါတယ် ဆရာဇော်ရယ်၊ ကျုပ်တို့ရွာက ဘာမှ ထွေထွေထူးထူးမရှိဘဲလေ၊ ခေါင်ကလည်း ခေါင်ပါဘိသနဲ့။ လူလေး မပျော်မှာသာ စိုးရပါတယ်။

ကျွန်တော်။ ရပါတယ်ခင်ဗျာ၊ ကျွန်တော်က ရောက်ရာအရပ်မှာ ပျော်တတ်ပါတယ်၊ နောင်အနေကြာသွားမှသာ ဦးကြီးတို့က အိမ်ကိုမလွမ်းသေးဘူးလား လူလေးရေလို့ မေးယူရမယ်ဗျ။

ဦးဘထိုက်။ (အလွန်သဘောကျသွားဟန်ဖြင့် တဟားဟားရယ်လျက်) ဟား..ဟား လူလေးက ပျော်တတ်တယ်ထင်ပ၊ ရပါတယ်မောင်ရာ..၊ ဆရာဇော်ညီဆိုတော့ ဦးကြီးတို့ရဲ့ တူသားပါပဲ။ ပျော်သလောက်သာ နေပါဗျာ၊ ကဲ..ဆရာဇော်ရေ ကျုပ်တို့သွားကြရအောင်၊ ဟိုဘက်ကမ်းကို မမှောင်ခင်ရောက်မှ ဖြစ်မယ်၊ မှောင်နေရင် မကောင်းဘူးနော့။

ဦးကြီးဘထိုက်ခတ်သော လှေကလေးဖြင့် ချောင်းကို စတင်၍ ဖြတ်ကြသည်။ ချောင်းကို ဖြတ်သည်ဆိုရာတွင် ကန့်လန့်ဖြတ် ဖြတ်ကူးရခြင်းမဟုတ်ပါ။ အောက်သို့အနည်းငယ်စုန်၍ အလျားလိုက်မျောပြီး ဖြတ်ရခြင်းဖြစ်သည်။ ကိုင်းပင်များပေါက်ရောက်နေသည့် ရေလယ်ကျွန်းသေးသေးလေးများ၊ သဲသောင်များကိုလည်း ကွေ့ကာဝိုက်ကာ ရှောင်ကွင်းရသေးသည်။ ချောင်းတစ်ဖက်ကမ်းရောက်တော့ မှောင်လုပြီ။ အလင်းရောင်သည် တည်းတည်းကလေးမျှ ကျန်တော့သဖြင့် မှောင်လုမှောင်ခင်ဟု ဆိုရပါမည်။ ထိုတစ်ဖက်ကမ်းချောင်းစပ်တွင် မီးကလေးများ မှိတ်တုတ်မှိတ်တုတ်ဖြင့် တန်ဆာဆင်ထားအပ်သော တဲငယ်လေးများ အစီအရီ ရှိနေကြသည်။ လှေသမားများ၊ သဗ္ဗာန်ခပ်သည့်သူများနှင့် အနည်းငယ်မျှပေါ်နေသော သောင်ခုံများပေါ်တွင် ရာသီသီးနှံစိုက်ပျိုးကြသည့် ယာသမားများ နေထိုင်ကြခြင်းဖြစ်သည်။ ထိုအနီးတ၀ိုက်ရှိ ရွာများသည် မြို့နှင့်ဆက်သွယ်လိုပါက ထိုချောင်းကိုသာ တစ်ခုတည်းသောလမ်းအဖြစ် ဖြတ်ကူးအသုံးပြုရသည်။ ဦးကြီးဘထိုက်က သူ့တဲလေးသို့ ၀င်ရောက်အနားယူရန် ဖိတ်ခေါ်ပါသေးသည်။ သို့သော် မှောင်သွားလျှင် ခရီးမတွင်မည်စိုး၍ ရွာဘက်သို့ ဆက်ထွက်ရန် ပြင်ကြရပါသည်။

သက်ကယ်ခြံရွာကလေးသို့ရောက်ရန် ညီအစ်ကိုနှစ်ယောက် စကားတပြောပြောနှင့် တစ်မိုင်သာသာခန့် လမ်းလျှောက်ရပါသေးသည်။ လွယ်တော့ မလွယ်လှပါ။ အစ်ကိုတာဝန်ကျသော ရွာကလေးသို့ သွားရသည်မှာ အမှန်ပင် ကုန်းတစ်တန်ရေတစ်တန်ဟု ဆိုရပါမည်။ သည်ရွာကလေးတွင် အစ်ကို မရောက်ခင်အထိ ဆရာမမြဲဟု ဆိုပါသည်။ ပြေားသူပြောင်း၍ ထွက်စာတင်သူတင်ဟု ဆိုပါသည်။ ဘာကြောင့် ဆရာမမြဲရသည်ကို ကျွန်တော် အနည်းငယ် ရိပ်စားမိသလိုလိုတော့ ရှိလာပါပြီ။ အကယ်၍ အမျိုးသမီးဆရာမတစ်ဦးသာဆိုလျှင် ဤရွာကလေးတွင် တာဝန်ထမ်းဆောင်ရမည့်အရေးမှာ လွယ်ကူလှမည်တော့ မဟုတ်ပါလေ။

သည်လိုနှင့် ည ၉နာရီခန့်သာသာ အတော်ကြီး မှောင်နေချိန်တွင်မှ ခရီးစဉ်ကို အဆုံးသတ်နိုင်ခဲ့ပါသည်။

+++

(၆)
လှေဆိပ်တွင် ဦးကြီးဘထိုက်က အစ်ကို့အပေါ် ပြုမူဆက်ဆံသည်ကိုကြည့်ပြီး အထူးအဆန်းဖြစ်ခဲ့ရသော ကျွန်တော်မှာ တစ်ရွာလုံးက အစ်ကို့အား ဆက်ဆံကြပုံကို မြင်တွေ့ရသောအခါတွင်မူ ထူးဆန်းသောအဆင့်ထက် ကျော်လွန်၍ အံ့အားကြီး သင့်ရပြန်ပါသည်။

ရွာကလေးသို့ ရောက်သောညက ကြိုဆိုလိုက်ကြပုံမှာ လှိုက်လှိုက်လှဲလှဲ ရှိလှပါသည်။ ရွာလူကြီးကအစ "ဆရာဇော်၊ ဆရာဇော်" နှင့် တစ်ဇော်ထဲဇော်၍ အစ်ကို့နာမည်ကို နှုတ်က မချတော့ပါ။ ဘုစုခရုခလေးများမှသည် ကျွဲကျောင်းသား၊ နွားကျောင်းသားအရွယ်ထိ အရွယ်စုံဆိုဒ်စုံ ကလေးပေါင်းစုံတို့ကလည်း "ဆရာကြီး၊ ဆရာကြီး" နှင့် အားရ၀မ်းသာ လာနှုတ်ဆက်ကြ၏။ ရွာလူကြီးက ကျနော်တို့ ညီအစ်ကိုနှစ်ဦးကို ညစာကျွေးမွေးရာ ဟိုအိမ်တစ်ခွက် သည်အိမ်တစ်ခွက်နှင့် ဟင်းခွက်များ လာပေးကြသည်မှာ ဟင်းခွက်သုံးရာပြည့်မှ ပွဲတော်တည်သည်ဆိုသော နရသီဟပတေ့မင်းကြီးပင်လျှင် မျက်စေ့လည်လောက်ပါသည်။ "မိုးလဲ အတော်ချုပ်နေပြီ။ အားလုံးပဲ ကရိကထများလှပါတယ်" ဆိုပြီး အစ်ကိုက မနည်းကြီး တားယူရသည်။

ဆိုရလျှင် သက်ကယ်ခြံရွာကလေးက အစ်ကို့ကို ချစ်ခင်ကြသည်။ ဖော်ဖော်ရွေရွေ ရှိလှသည်။ အရင့်အရင် ဆရာတွေလို သည်ရွာကလေးမှ ပြောင်းရွေ့သွားမည်ကို သူတို့ စိုးရိမ်ကြသည်။ ထို့ပြင်တ၀ သူတို့သားသမီးတွေကို ပညာတတ်ကြီးတွေ ဖြစ်စေချင်သည်။ ပညာသည်သာ ဆင်းရဲတွင်းမှ လွတ်မြောက်ရာဟု ယုံကြည်ကြသည်။ သည်တော့ သူတို့ရွာကလေး၏ အားထားရာ တစ်ခုတည်းသော စာသင်ကျောင်းကလေးကို မဖြစ်ဖြစ်အောင် ကျားကန်ထောက်ပံ့ထားကြသည်။ ရုပ်ဝတ္ထုပစ္စည်းများ အပုံအပင် လိုအပ်လျက်ရှိသည် မှန်သော်လည်း သည်လို ခံယူချက်ပြည့်ဝသော ကျောင်းကလေးမှာ လုပ်အားပေးဆရာ ဖြစ်ခွင့်ရသည့်အတွက် အတိုင်းအဆမသိ ကြည်နူးဝမ်းမြောက်ရပါသည်။

ပထမဦးဆုံး ကျောင်းစဖွင့်သည့်နေ့က အဖြစ်အပျက်ကိုတွေး၍ ပြုံးရသေးသည်။ အဖြစ်အပျက်က ဂွတီးဂွကျ နိုင်သည်။ အတွေ့အကြုံမရှိသေးတော့ ကမောက်ကမလည်း ဖြစ်ရသည်ပေါ့။ အဲသည်နေ့က ကျွန်တော့်ကို သူငယ်တန်းမှာ စာသင်ခိုင်းသည်။ ယခုနှစ်မှ လာအပ်ကြသော ကျောင်းသားအသစ်ကလေးတွေ ဖြစ်သည်။ ငါးနှစ်ခြောက်နှစ်သားအရွယ် ကလေး ပေါက်စနလေးတွေပေါ့။ အစ်ကိုက ကျနော့်စိတ်ကို စမ်းသပ်ခြင်းလည်း ဖြစ်နိုင်ပါသည်။ ကျောင်းဆရာလုပ်ဖို့ ဘယ်လောက် စိတ်ရှည်သလဲ၊ ဘယ်ရွေ့ဘယ်မျှအထိ စိတ်ပါဝင်စားမှု ရှိသလဲဆိုတာကို စမ်းသပ်နိုင်ရန် သူငယ်တန်းကလေးများကို စာသင်ခိုင်းခြင်းသည် အသင့်တော်ဆုံး နည်းလမ်းပင် မဟုတ်ပါလား။

သူငယ်တန်းကလေးတို့ရဲ့ ထုံးစံအတိုင်းပါပဲ။ ငိုသူငို၊ ဆော့သူဆော့၊ စကားများသူများ။ ကျနော့်စိတ်ထဲ မျောက်ပေါက်စနလေးတွေရှေ့ ထွက်ရပ်နေရသလား အောက်မေ့မိသေးသည်။ ရှေ့က ကျောက်သင်ပုန်းကြီးကို ကြိမ်နဲ့ တဖုန်းဖုန်းရိုက်လိုက်တော့မှ အားလုံး တိတ်သွားကြသည်။

"ဆရာ ပုံပြောပြမယ်" ဆိုတော့ သူတို့အားလုံး ငြိမ်သွားကြ၏။ ဘာပါလိမ့်ဟူသော မျက်နှာပေးလေးများဖြင့် ကျနော့်ကို ပြူးကြည့်နေကြသည်။ ကျနော်က အသေအချာ ရွေးချယ်စဉ်းစားထားပြီး ဖြစ်သည့်အတိုင်း ရွှေယုန်နှင့်ရွှေကျားပုံပြင်ကို အမူအယာ ခြေဟန်လက်ဟန်သာမက အသံကိုပါ အမျိုးမျိုးပြောင်းလျက် ပြောပြလေသောအခါ သူတို့လေးတွေ ရယ်လိုက်ကြတာ။ ကလေးတို့ ဘာသာဘာဝ ပုံပြင်ကြိုက်ကြသည်ကိုး။

ကျွန်တော် ။ မင်းတို့ ပုံနားထောင်ကြဦးမလား။

"နားထောင်မယ် ပုံပြောပြ" ဟု အားလုံးက ၀ိုင်းအော်ကြသည်။ ဤတွင် ကျနော်ဆင်ထားသည့်အကွက်ထဲ ၀င်လာပါပြီ။

ကျွန်တော် ။ အေး..ကောင်းပြီ။ ဒါဆိုရင် ဆရာက မင်းတို့ကို ကကြီးခခွေး အရင်စသင်မယ်။ အဲဒါကို မင်းတို့က လိုက်ဆိုရမယ်။ ပြီးရင် လိုက်ရေးရမယ်။ ဆရာခိုင်းတဲ့အတိုင်း ပြီးအောင်လုပ်နိုင်တဲ့သူကို ပုံပြောပြမယ်။ မပြီးတဲ့သူကိုတော့ ဆရာက ဟောဒီ ကြိမ်လုံးကြီးနဲ့ ရိုက်မယ်။(သည်နေရာတွင် ရိုက်မည်ဆိုသော ကြိမ်လုံးကြီးဖြင့် ကျောက်သင်ပုန်းကို တဖုန်းဖုန်း ပုတ်ရသည်ပေါ့)

"အားလုံး လုပ်နိုင်ကြမလား" ကျနော်လည်း သူတို့လေးတွေနည်းတူ အော်၍ မေးရသည်။

"လုပ်နိုင်ပါတယ် ဆရာကြီး" ကလေးတွေအားလုံးက အားတက်သရော ဖြေကြသည်။ သည်တော့မှ ကျွန်တော်က ကကြီးခခွေးအစရှိသော ဗျည်းအက္ခရာသုံးဆယ့်သုံးလုံးကို သူတို့လေးတွေ စိတ်ဝင်စားအောင် အမျိုးမျိုးအဖုံဖုံ သာဓကဆောင်၍ သင်ကြားပြသရသည်။ ရုပ်ပုံတွေ ဆွဲပြရသည်။ ကဗျာအတိုအစလေးတွေ ရွတ်ပြရသည်။ အမူအရာ လုပ်ပြရသေးသည်။ နည်းနာနိသျှအပေါင်းကို စုံတကာစေ့သွားတော့သည်။ သူတို့လေးတွေက ကောင်းကောင်းမွန်မွန် လိုက်လုပ်ကြတော့ ကျနော်ကလည်း ပေးထားသည့်ကတိအတိုင်း ပုံပြောပြရသည်ပေါ့။ ကျွန်တော် သည်တခါပြောပြသည်က အာလာဒင်မီးခွက်နှင့် ထိုမီးခွက်ကိုစောင့်သော ဘီလူးကြီးအကြောင်း။

ဖြစ်ချင်တော့ ကျွန်တော် ပုံပြောကောင်းနေတုန်းမှာ မိုးက ဗြုန်းစားကြီး ရွာချလာသည်။ မိုးခေါင်သောဒေသမှာ ရှားရှားပါးပါး မိုးရွာသည်ဆိုတော့ ကလေးတွေက ၀မ်းသာအားရ ထအော်ကြသည်။ အနောက်ဘက်ထောင့်တွင် ခပ်ကုတ်ကုတ်ထိုင်နေသော ကလေးငယ်တစ်ဦးက အော်ရုံမျှမကဘဲ မိုးရေတွေထဲ ၀ုန်းခနဲ ပြေးထွက်သွားသည်။ ကတုန်းပြောင်ပြောင်နှင့် အနှီမောင်ကျောင်းသားမှာ တစ်စုံတစ်ခုဆီသို့ သဲသဲမဲမဲ ပြေးသွားခြင်းဖြစ်သည်။ သူပြေးထွက်သွားတဲ့ဆီ သေသေချာချာ ကြည့်လိုက်တော့မှ လား..လား..ပုစွန်လုံးကြီးပါလား။ တွင်းရှိရာဆီသို့ စောင်းငန်းစောင်းငန်း သွားနေသော ပုစွန်လုံးကြီးက လက်မတွေတထောင်ထောင်နှင့် မာန်စောင်နေသည်။ ကလေးငယ်က ပုစွန်လုံးကြီးအနီးသို့ရောက်သော် အသာဒူးထောက်ထိုင်ချလိုက်ပြီး အနှီပုစွန်လုံးကြီးကို အုပ်ကိုင်ဖို့ ပြင်နေပါပြီ။ ပုစွန်လုံးကြီးကလည်း သူ့ရဲ့ လွှသွားပမာလက်မကြီးတွေကို ညှပ်ဖို့လိမ်ဖို့ ထောင်ထားပြီလေ။

အလို..ညှပ်တော့မယ်တဲ့၊ လိမ်တော့မယ်တဲ့။

ကျွန်တော့်ခန္ဓာကိုယ်ဟာ ဘယ်လိုကနေဘယ်လို အဲသည်နေရာကို ရောက်သွားတယ် မသိလိုက်ပါ။ ရုတ်ချည်းဆိုသလိုပဲ ပုစွန်လုံးကြီးကို ကလေးငယ် မကိုင်နိုင်ခင်မှာ ကျွန်တော်ကအရင် ဦးအောင်ကိုင်ပြီး လွှင့်ခါပစ်ဖို့ ကြိုးစားလိုက်သည်။ သို့သော် မရပါ။ ပုစွန်လုံးကြီးက ကျွန်တော့်လက်ကို ပြုတ်တူပမာ မိမိရရကြီး ညှပ်ထားလိုက်ပြီ ဖြစ်ပါသည်။ အသဲခိုက်မျှ နာလှပါ၏။ ကလေးငယ်က ကျနော် မျက်နှာရှုံ့မဲ့နေသည်ကိုကြည့်ပြီး ပုစွန်လုံးကြီးကို ဒေါသထွက်သွားဟန် တူပါသည်။ ပုစွန်လုံးကြီး၏ ကျောဘက်ဆီမှ အသာအုပ်မိုးကိုင်၍ မြေပြင်ဆီသို့ အားပါးတရ ပစ်ပေါက်လိုက်ပါတော့သည်။ ကျောပေါ်မှအုပ်၍ ကိုင်လိုက်သောအခါတွင်မူ ၎င်း၏ လက်မကြီးများမှာ အလိုက်သင့် ကွေးညွှတ်သွားကြပြီး မည်သို့မျှ လှုပ်ရှား၍မရတော့ပါ။ ကျွန်တော်မှာ ဒါကိုမသိ၍ ခံလိုက်ရခြင်းပင်။ ကလေးအတွက် စိတ်ပူမိသကိုး။

အခုတော့ ကလေးငယ်က ကျနော့်လက်ကိုကိုင်ပြီး ပါးစပ်နှင့် ကုန်းမှုတ်နေသည်။ ပြီးတော့ မေးရှာသေးသည်။ "ဆရာကြီး နာသွားသလား" တဲ့။ ငိုအားထက် ရယ်အားသန်ရပါသည်။

တဖြည်းဖြည်း အချိန်ကြာလာသည်နှင့်အမျှ စာသင်ကျောင်းကလေးမှာ ကျင်လည်လှုပ်ရှားရတာ အသားကျလာသည်။ ကလေးတွေကို စာသင်ရတာ ပျော်စရာကောင်းလှသလို စိတ်ကြည်နူးစရာလည်း ကောင်းလှပါသည်။ ရပ်ရွာနှင့် ဆက်ဆံရသည်မှာလည်း အဆင်ပြေလှပါဘိ။ ထိုစဉ်က အသက် ၁၆နှစ်သာသာမျှရှိသေးသော ကျနော့်ကို ရပ်မိရပ်ဖများနှင့် တစ်ရွာလုံးလိုလိုက "ဆရာလေး" ဟုခေါ်ကြသည်ကိုတော့ ရှက်နိုးဝါ၀ါ ပြုံးရပါ၏။

+++

(၇)
ကျနော်သည်ရွာလေးသို့ မလာမီညက တစ်ဝကြီးထိုင်ကြည့်ခဲ့သော သော်တာလမင်းကြီးသည်ပင် သုံးကြိမ်သုံးခါတိတိ ၀ိုင်းဝိုင်းစက်စက် ပြည့်သွားလေပြီ။ မိုးသည် နွေကို ၀ါးမြိုစားသောက်ရန် အားယူစပြုနေပြီ။ ကိုင်းတောများ၊ ဖုန်းဆိုးမြေကျတ်တီးကုန်းများဖြင့် ၀န်းရံအပ်သော သက်ကယ်ခြံရွာကလေးက ကျွန်တော့်ကို အိမ်ရှင်ပီသစွာ နွေးနွေးထွေးထွေး စောင့်ရှောက်ထားသည်မှာလည်း ထိုအချိန်တို့နှင့်အမျှ ကြာခဲ့လေပြီ။ ဆယ်တန်းအောင်စာရင်းထွက်ရန်မှာလည်း အလွန်နီးကပ်လာပြီ။

ကိုယ့်ကိုယ်ကိုတော့ သတိမထားမပါ။ အနည်းငယ်ရင့်ကျက်လာသည်ဟုတော့ ဆိုနိုင်ကောင်းမည် ထင်မိပါသည်။ မြို့တွင် ကျောင်းသွားတက်စဉ်ကာလက အထက်တန်းကျောင်းသားပီပီ အလွန်ပျော်သည်။ သူငယ်ချင်းများနှင့် အမြဲလိုလို စုရုန်းစုရုန်း..။ လသာသောညများဆိုလျှင် သူငယ်ချင်းငြိမ်းချမ်းမောင်ရှိရာ ဆေးရုံကုန်းသို့ တအုပ်တမကြီးသွား၍ ဂီတာတီးကြ၊ သီချင်းဆိုကြသည်။ အချိန်ရမည်ဆိုလျှင် မိဂျမ်းတို့အိမ်ဝင်၍ လက်ဖက်သုပ်စားကြသေးသည်။ တစ်ခါတစ်ရံ ညနေစောင်းများတွင်မူ ပင့်ကူတောင်ထိပ်ရှိ အေးသုခစေတီပေါ်တက်၍ ဘာရယ်မဟုတ် နေ၀င်ချိန်ကို ကြည့်ကြသည်။ ခံစားတတ်လွန်း၍တော့မဟုတ်ပါ။ သည်လိုပင် ကျွန်တော်တို့ လူငယ်ပီပီ ပျော်ခဲ့ကြခြင်းသာ ဖြစ်သည်။ အသက်အရွယ်ကလည်း ငယ်သေးသည်လေ။ ၁၅၊ ၁၆ဆိုတာ တကယ်ကို ပျိုရွယ်ငယ်နုတဲ့ လူငယ်တွေပဲကိုး။

အခုဆိုလျှင်ကော...။

အခုလည်း ကျွန်တော့်အသက်မှာ တစ်နှစ်ခန့် အသက်ပိုကြီးလာသည်မှလွဲ၍ ဘာမှမထူးခြားပါ။ လူငယ်ပင် ရှိပါသေးသည်။ သို့သော် အနည်းငယ် တည်ငြိမ်ရင့်ကျက်လာပြီဟု ဆိုရမည်လား။ ကျောင်းသားတွေရှေ့မှာ စာသင်ရသော ကျောင်းဆရာဘ၀၀ယ် နေချင်သလိုမနေရ၊ ထိုင်ချင်သလိုမထိုင်ရ အစပြုသော ဆင်ခြင်အပ်သည်တို့ကို အချိန်ကြာမြင့်လေ ပို၍ သတိပြုမိလေ ဖြစ်ရပါသည်။ နေမှုထိုင်မှု စည်းကမ်းမျှသာမက အပြောအဆို၊ အတွေးအမြင်မှအစ တတ်စွမ်းသမျှ ကောင်းသည့်ဘက်သို့ ဦးတည်ပြောင်းလဲ ပစ်ရပါသည်။ ထိုသို့ မဟုတ်မူဘဲ ကျွန်တော်၏ မကောင်းသော အကျင့်စရိုက်များသည် ထိုကလေးငယ်တို့အပေါ် လွှမ်းမိုးအုပ်စိုးခဲ့မည် ဆိုပါက ကျွန်တော်၏ ပညာဖြန့်ဝေသောအလုပ်သည် အဘယ်မှာလျှင် အဓိပ္ပါယ်ရှိပါတော့မည်နည်း။ အဓိပ္ပါယ်မရှိရုံမျှမက အဓိပ္ပါယ်မဲ့လေပြီ။ ကျွန်တော်သည် ပန်းပင်ကလေးများကို ပြုစုပျိုးထောင်ပေးသူ ဥယျာဉ်မှူးမမည်တော့ဘဲ ပင်စည်၏ အဖူးအညွှန့်လေးများကို ကိုက်ဖဲ့ဝါးမြိုဖျက်ဆီးသည့် ပန်းဖျက်ပိုးသာလျှင် ဖြစ်ပေတော့အံ့။ သို့ဖြစ်သောကြောင့် ပညာသင်ကြားပေးခြင်း (၀ါ) ကျောင်းဆရာအဖြစ် တာဝန်ထမ်းဆောင်ခြင်းသည် သတိကြီးစွာ ထားရမည်မှာ ဧကန်ဖြစ်ကြောင်း တစ်စတစ်စ တိုး၍ သဘောပေါက်လာမိပါသည်။

အမေရှိရာ ကျွန်တော့်ဇာတိ မွေးရပ်ဌာနေကို ပြန်ရတော့မည်ဆိုသောအခါ မောင်သက်ထွေးဆိုသော လေးတန်းကျောင်းသားလေးက လှေဆိပ်သို့ သူကိုယ်တိုင် လှည်းကြုံလိုက်ပို့ပါရစေဟု ပြောလာပါသည်။ မောင်သက်ထွေးသည် စာရေးကောင်းသူ ဖြစ်သည်။ သူ၏ စာစီစာကုံးများတွင် အရွယ်ကိုလွန်သော တွေးဆမြော်မြင်မှုများ၊ ကြောင်းကျိုးဆက်စပ်ယူပုံများကို တွေ့နိုင်သည်။ ကျွန်တော်နှင့်မူ အသက်အားဖြင့်မကွာလှ။ မောင်သက်ထွေး၏အသက်မှာ ၁၂နှစ်ခန့်ရှိလေပြီ။ တောရွာများမှာ ဖြစ်လေ့ဖြစ်ထရှိသည့်အတိုင်း သုံးတန်း၊ လေးတန်းဆိုလျှင် လူကောင်ကြီးတွေက မိုးထိုးနေသည်။ ခမျာတို့မှာ တစ်နှစ်တစ်တန်း မှန်မှန်တက်ဖို့ကလည်း မလွယ်ကူရှာကြ။ မိဘဖြစ်သူတို့၏ လုပ်ငန်းကိုင်ငန်းအပေါ် မူတည်၍ တစ်နှစ်တန်သည် နှစ်နှစ်တန်သည် ကျောင်းနားလျှင် နားလိုက်ကြသည်။ စီးပွားရေး သောင်သာလျှင် သောင်သာသလို ကျောင်းပြန်တက်လိုက်ကြပြန်သည်။ သည်တော့ လေးတန်းလောက်ဆိုလျှင်ပဲ အသက်က တော်တော်ကြီးနေကြပြီ။

စာသင်သက်ကလေး တစ်လကျော်ကျော်မျှရလာတော့ အစ်ကိုက လေးတန်းကျောင်းသားတွေကို စာသင်ခိုင်းသည်။ လေးတန်းကျောင်းသားတွေဆို၍ သိပ်တော့ များများစားစားကြီး ရှိတယ်မထင်ပါနဲ့။ အားလုံးပေါင်းပါမှ သုံးယောက်သာ ရှိကြကုန်၏။ ကျွန်တော် သင်ကြားပေးရသည်က မြန်မာစာနှင့် သမိုင်း။ ဘာပဲပြောပြော သူငယ်တန်းကလေးများကို သင်ရသည်ထက် တာဝန်ပိုကြီးလာသည်ကတော့ အမှန်ပင်။ သူတို့အသက်အရွယ်၊ သူတို့အတွေ့အကြုံက သူငယ်တန်းကလေးများနှင့် နှိုင်းယှဉ်သော် အတော်အသင့် ရင့်ကျက်ကြပြီ။ တွေးစ၊ ခေါ်စ၊ စဉ်းစားစ ပြုကြပြီ။ ဘ၀အကြောင်း စူးစမ်းလေ့လာစ ပြုကြပြီ။ သည်တော့ ကျွန်တော်ကလည်း အတတ်နိုင်ဆုံး ပြင်ဆင်ပြီးမှ စာသင်ရသည်။

သူတို့လေးတွေကို စိတ်ပိုင်းဆိုင်ရာ တိုးတက်မြင့်မားလာစေဖို့လည်း အားထုတ်ရသည်။ ကိုယ်ကျင့်တရားကောင်းအောင်၊ ရိုးဂုဏ်ကို တန်ဖိုးထားမြတ်နိုးတတ်လာအောင် သူတို့ဘ၀ထဲကို ထဲထဲဝင်ဝင် သွားလာလှုပ်ရှားပြီး သူတို့ နားလည်သဘောပေါက်လွယ်အောင် သင်ကြားရသည်။ လပိုင်းမျှ သင်ကြားသည့် ကျွန်တော်ပင်လျှင် သည်မျှလောက် ကြိုးပမ်းခဲ့ရသည်ဆိုလျှင် နှစ်လုံးပေါက် သင်ကြားနေသော အစ်ကိုမှာမူ ဆိုဖွယ်ရာမရှိ။ ထို့အတူ အခြားတစ်ပါးသော ဆရာ၊ ဆရာမများ၊ ပညာရေးဝန်ထမ်းများမှာလည်း ဤသို့သာလျှင် ရှိကြပါလိမ့်မည်။ ဆရာ၊ဆရာမများ၏ ၀ါသနာ၊ စေတနာနှင့် အနစ်နာခံနိုင်စွမ်းတို့ကို မြတ်နိုးဂုဏ်ယူစွာ ဦးညွှတ်မိပါတော့သည်။

သေးငယ်သော လုပ်ဆောင်ချက်ကလေးများပင် ဖြစ်လင့်ကစား ထိုက်သင့်သလောက် အောင်မြင်ခဲ့သည်ဟု ဆိုရပါမည်။ ကျွန်တော် မျှော်လင့်မထားခဲ့သော အရာတစ်ချို့ပင် ဖြစ်မြောက်အောင်မြင်ခဲ့ပါသေး၏။ လေးတန်းကျောင်းသားလေးသုံးယောက်နှင့် ရွာမှလူငယ်တို့ပူးပေါင်း၍ ရွာလယ်လမ်းမကြီးကို ပြုပြင်နိုင်ခဲ့သည်။ ဘုန်းကြီးကျောင်းအနောက်ဘက်ရှိ ကိုင်းထူသော မြေရိုင်းကွက်ကြီးကို ခုတ်ထွင်ရှင်းလင်း၍ ရာသီသီးနှံများစိုက်ပျိုးရန် စိုက်ခင်းတစ်ချို့ ဖန်တီးနိုင်ခဲ့ကြ၏။ ကျောင်းတွင် စာစီစာကုံးပြိုင်ပွဲများကိုလည်း အခါအားလျော်စွာ ကျင်းပပေးနိုင်ခဲ့ရာ မောင်သက်ထွေးလို စာရေးကောင်းသော ကျောင်းသားလေးများ ပေါ်ထွက်လာပါသည်။ စိုင်ပြင်ဈေးတွင် ကားစောင့်နေကြစဉ် အစ်ကိုဝယ်ပေးထားသော စာအုပ်များနှင့် ခဲတံများကို ဆုအဖြစ် ချီးမြှင့်ပေးခဲ့ပါသည်။

မည်သို့ပင်ဖြစ်စေ ကျွန်တော့် လုပ်ဆောင်ချက်လေးများမှာ နည်းနည်းနဲ့ ကျဲကျဲဝိုင်းသည်ပဲဆိုဆို၊ "ခါချဉ်ကောင်မာန်ကြီးလို့ တောင်ကြီးဖြိုမဲ့ကြံ၊ ခါးကမသန်" လို့ပဲဆိုဆို ဆိုချင်သလိုသာ ဆိုကြပါစေတော့။ အရွယ်ငယ်ငယ် မာန်စွယ်နုနုရှိရသေးကား ထိုက်သင့်သလောက်အောင်မြင်သည်ဟုပဲ လက်ခမောင်းခတ်မိမည် ထင်ပါသည်။

+++

(၈)
ပြန်မဲ့ညက တစ်ရွာလုံးနီးပါး လာနှုတ်ဆက်ကြပါသည်။ ဆယ်တန်းကို အမှတ်တွေတသီကြီးနှင့် (ဂုဏ်ထူးတွေဘာတွေကို သူတို့ မသိကြသေး။) အောင်ပါစေကြောင်း ဆုတောင်းပေးကြသည်။ တက္ကသိုလ်ကျောင်းသားကြီး ဖြစ်သွားလျှင်လည်း သည်ရွာလေးကို မေ့မသွားဖို့ အထပ်ထပ် မှာကြရှာသည်။

အိမ်ထွက်၊ ခြံထွက်၊ ရွာထွက် လက်ဆောင်ပစ္စည်းများကိုလည်း တစ်ယောက်တစ်မျိုး လာပေးကြသည်။ မယူလျှင်လည်း စိတ်ကောင်းကြမည်မဟုတ်၍ လမ်းခရီးခက်ခဲသည်ကို အကြောင်းပြကာ စိတ်မကောင်းစွာ လက်ကာပြရသည်။ အားတုန့်အားနာ တောင်းပန်ရသည်။ တစ်ချို့ကို ရွာဦးဘုန်းကြီးကျောင်းသို့လှူ၍ တစ်ချို့ကို လာနှုတ်ဆက်သည့် တပည့်လေးတွေကို ဝေပေးလိုက်သည်။ သူတို့စေတနာ ဖြူစင်လှသည် မှန်သော်လည်း သည်ရွာကလေးမှ ဘာတစ်ခုမျှ ကျွန်တော် အလိုမရှိပြီ။ "အများအကျိုးကို စွမ်းနိုင်သမျှ လုပ်ဆောင်ခြင်းသည် အတိုင်းမသိသော စိတ်ကြည်နူးမှုကို ရစေသည်" ဆိုတဲ့သင်ခန်းစာကို သည်ရွာကလေးက ပေးလိုက်ပါပြီ။ ဒါသည်ပင် ကျွန်တော့်အတွက် အကောင်းဆုံး လက်ဆောင်မွန်ဖြစ်ပါတော့သည်။

အပြန်ခရီးသည်လည်း အလာတုန်းကနည်းတူ ကုန်းတစ်တန်ရေတစ်တန်ပင် ဖြစ်ပါသည်။ အလာခရီးတုန်းက အတွေ့အကြုံသစ်တွေကို တွေ့ကြုံရတော့မှာမို့ ရင်ခုန်ကြည်နူးရသလို အပြန်ခရီးတွင်လည်း ကျွန်တော် ပျော်နေမိပါသည်။ ကျွန်တော့်နှလုံးသား ဖြူခဲ့သည့်နေ့များအကြောင်း အမေ့ကို ပြောပြနိုင်တော့မည် မဟုတ်ပါလား။

အသက်အရွယ်ကြီးရင့်လာသည်နှင့်အမျှ လူသားတစ်ဦးပီပီ ကျွန်တော့်နှလုံးသားသည်လည်း ညစ်ထေး လာပါလိမ့်ဦးမည်။ အရောင်အမျိုးမျိုး၏ စွန်းထင်းပေကျံမှုဖြင့် နွမ်းညစ်လာပါလိမ့်ဦးမည်။ လောက၏ အပေးအယူသံသရာဝယ် ဘေးလူများနှင့် မအပ်မရာသော ပဋိပက္ခများ ဖြစ်ပါလိမ့်ဦးမည်။

ကိစ္စမရှိပါ။

ဘ၀ရှုခင်းဝယ် သာယာလှပသော အရာမျိုးလည်း မကြာခဏရှိလာတတ်ပြန်ရာ ကျွန်တော် ငယ်စဉ်အရွယ်က သက်ကယ်ခြံရွာကလေးတွင် လုပ်အားပေးဆရာအဖြစ် စာသင်ခဲ့ရသော နေ့ရက်များသည် ကျွန်တော်ကို အမြဲအစဉ် ပျော်ရွှင်စေပါလိမ့်မည်။

ပင်လယ်ပြင်ပေါ် ရွာသောမိုးများကို ကျွန်တော်တို့ ကြိမ်ဖန်များစွာ မြင်တွေ့ခဲ့ကြဖူးပြီ။ အခုတစ်ကြိမ်မတော့ ကန္တာရပေါ်ရွာသောမိုးကို နဖူးတွေ့ဒူးတွေ့ ကျွန်တော်တွေ့ခဲ့ရပါပြီ။ မိုးစက်လေး တစ်ပွင့်တစ်ပေါက်အားမျှဖြစ်စေ ပါဝင်ခွင့်ရသည့်အတွက်လည်း ပြောမပြတတ်အောင် ကြည်နူးပီတိဖြစ်ရပါသည်။ ကန္တာရသားတို့အတွက် ထိုမိုးသည် ဆေးဖက်ဝင်လိမ့်မည်ဟု ယုံကြည်နေမိပါသည်။

ညိမ်းညို
၁၂၊ ၃၊ ၂၀၀၄